I pu i pate’ pilna le theihna khempeuh pen lakam le paunakte tawh kiciamteh hi. Lai nei lo ihih manin kam tawh lotngah (Oral Tradition) ciamteh suksukin a khang a khangin kihilh sawnsawn hihang. Hihte sungah pilna lak theih ding tampi om bektham loin lai lam tawh kisai lakam, kam malthuk, tang(lai) kamte (Pau upa) kihel ahih manin i gou i gamhpi ahi hi. Thei ding, pilna la ding, le kepcing ding ahi hi.

A.

1. Acingh masa thuh zawh loh; A tai masa phak zawh loh

2. A hang si leh a hang piang

Makai khat a om loh hangin, makai ding a thak piang.

3. Aisa a pi phei pai, a no zong phei pai

Aisa no in a pi sun, mihing zong pianna nute kisun.

4. Aii-tui dawn, luang kham

Thuman gen veve minih thu kituhna-ah a nuntakna kham-in tuisia ne hi. Tuisia nek cingin, han-a pu le pate’ luguh hawm lai-in tüa sungah sahang ha le meihoih tuidiah-in, siampipa in mawhpa tungah sahang’ pehlup ding, meikang tuak ding le, thakhat-in natna ngah-a sih ding le, a mawh lona hong kilat khiatna dingin phuisam a, thukhen zum pan tuisia nek ngeina om bangin a kíciam mite thu, thu tawpná suaksak hi.

5. Ai kua han

Aisa a kua sungsawk leng hangsan in hong pet napi, a pua ah pusuak khia leh a meidawi bangin mihing zong bangkua sung teng ah tapkual han in mite lakah mei dawi.

6. Aisa kop bang

Na dang khempeuh nih ciangin kopkhat in kisim a, dawi biakna in aisa a kizat ciangin li ciangin kop khat in kisim.

7. Aisa bang a guh tung nun

(A sung lam lungsim hoih taleh, a pua lam gamtat kam pau a khauhte)

8. Aisa longek-a zolo durs

A kua sung-a om aisa a kimat nop ciangin a pua ah lo-ngek in a kizol bangin, mihing zong khemna leh zolna om thei.)

9. Ai mitdeh bang

(A) Aisa a mit kideng leh tang thei non lo, mihing le ganhing dangte zong ki-vel khial thei. Gam lumlialua kimlai khawl sak.
(B) Aimit deh bang. Aisa a mit mekkham leng tangthei nawn lo. Dai pah khipkhep.

10. Akpi duhgawl, lawh kikhup

Akpi huaiham in lawh sung-a an lak ah a om nopmanin, lawh kilikin amah a khup bangin, huaiham luatna suplawh thei.

11. Akta lal kuan ki-tu leekleek

Akte a ci man kuan ding cingin amau teng mah a kituktuk bangin, mihingte zong innkuan sung, pawl sung, khua sungah kitotną a tam cingin, kiamsukna, gimngahna, khitui luanna tawh kizom thei.

12.  Aktui suam le sila suam

Akpi tui lai suam le sila sham pen, a neite supna le kiam suak semsem nading kipat na. Aktui keuh sak man loin suam pahpah leng ak nei lo, sila that leng nasem ding om lo; supna piang.

13.  Akpa tosel bang

Akpa in singkung ah tuang in a kim a pam don loin a ut bangin a khuan bangin, mihing zong ki-phasak in zahtak dingte thei loin a pheng paupaute akpa tosel bang kici hi.

14.  Aktui sung a om, a vom ding le a kang ding kithei khol lo

Mai lam a piang ding thu i genkholh theih om lo hi.

15. Ak khum suakta bang

A kikhumcip ak khat kikhahkhia leh lungdam in, diangin, khuang a, sangak in a zak ciangin a mat theih bangin, mihingte zong suahtakna zat khialh a lauhuai-na gennopna hi.

16. Ak gul mu bang

Ak in gul a muh ciangin lau, mihingte zong a zahtakhuai le a nuntakna tunga, thu nei theite mai ah ak gul mu bang hi thei.

17. Akno tui-ta bang

Akno tuikia kawt likliak-in a kisuahtaksak bangin, mihingte zong tua bang hun tuak kha thei. Zawngkhal.

18. Akpi khuang in zawlgai hil

A khuang ding a hi lo akpi a khuan ciangin, huai nei-in, zawlgai thusia hil hi, ci-in kiciamteh hi.

19. Ak gual bangin vakk heihei

Ak gual in a lawmte a zahtak bangin, mihing zong a khangual lak a maingal lote pawl genna.

20. Ak kiho bang

Ak kiho ging lo, mihing zong a gei-ate’ tel loh-a kihuaute genna.

21. Aksia khuang bang

Ak in khuanhun nei-a, a hun lopi-a khuangte ak-sia kici hi. Aksia khuang pen aw ngaih lo, lasa siam lo le aw hoih lote aksia khuang bangin kiza thei.

22. Akngum deen bang

Akngum deen tuk pah, mihing zong kivellum kha thei.

(Rev: Thang Kam’ gelh- Zomite’ Paunak le Thugilte laibu pan)