Leitung ah mihing leh ganhingte in Nu kinei ciat hi. Nute itna pen lian mahmah a,leitung ah tehpih ding om lo hi. Biakna khempeuh phialin NUTE NI kinei ciat a, ni thupi khatin kiciamteh hi. A hi zongin i bawl zia leh a ni a khate kibang kim lo hi. Ei Chritsiante in atam zaw kumsim May kha Nipi nihna sung kizang den hi. Nute Ni i bawl zia leh a Nite thupi hi lo zawin, Nute thupitna i theina ding deihna tawh Nute Ni hong piang khia ahi hi.

Nute Ni I cih in NUte hong itna le hong gimpihna, nang hanga athuaknate lungngai in NUte thupitna phawk thei a, lungdam thei-in Nute itin, zahtakin Nute itna thukkik ding kip hawksakna in kibawl ahi hi.

Tuisik a i pian a kipan na Nu in kha 10 sung bang agilsung ah hong paii hi-a, i suahkhiat a kipan i khangcing dong hong cing hong kep hong donnate na thuk kik zawh ding hi lo hi. Ahang khat peuhpeuh tawh na Nu in hong kem kha lo hiphial lehzong na pianna na NU mah hi-a, laih theih, bawlphat theih hi lo ahih manin na NU it in zahtak a, na lungdamsak ding ahi hi. NU tung itna lak ding, lungdamsak ding cih ciangin van le na a thupi masa hi loin na Nu a lungdam ding a thupi ahi hi.

Nu tung lungdamna pulak na-in Nu na itna, Van le na, anlim tuilim, nikhoih puanhoih piak ding athupi masa hi lo hi. Gengen lohsa-in Nute in thei peuhmah inteh, kamgen khawng phamawk dah ci lo ding. Mihing in phamawh dah I cih teng aphamawh hi zaw a, thamlo I sak tengmah itna kipatna bulpi hi zaw hi. Na kam guak bekmah ahi zongin,” Nu aw, hong it ing, Nu aw hong ngai ing, Nu aw lungdam ing,” ci tangtang in. Tua in Nu tung itna, zahtakna le lungdamlahna hoih mahmah ahi hi.

Nu le Pa, it ding zahtak ding pen Khristian ngeina hi-a, ut le utloh thu tawh teltheih nam hi lo hi. Efesa 6: 1-3; Tate aw, na nu na pate uh thu na man ding uh Khristian ngeina hi a, ahi ding mah ahi hi. Thupiakna a lian khat in, “Na nu le na pa zahtak in,” cihna hi a, khapna thu tawh kizom pahin, “Zahtak lecin nang a dingin thu hong hoihin, leitungah na khan a sau ding hi,” na ci pah hi.

Endik Pawl