Minam picing khatin hong kiciapteh theih nadingin a kisam le thupi tampite lak pan Pau le Lai pen a kihel loh phamawh hi. Hun khat lai-in i Pupate’n khat le khat kihona le nate minlawh nadingin pau nei uh hi.Tua paute (kammalte) ciamtehna dingin Lai nei lo uh ahih manin, gal le sa amat uh ciang, a galmat samatte uh a ciapteh nadingun alim tawh suai-in mualsuang bawlin, mualsuang na phut uh hi.

Zomite’n Lai nei loin kum tampi i om khit ciang, nitumna lam pan Pasian nasem sangmang Cope Topa tungtawngin, i pau kammalte ciamteh theih nadingin tu hun aa i zat ahih A,B,C (Roman Alphabet) lai malgawm tawh Lai hong bawlsak a, Pasian thugil i theih nadingin Laisiangtho zong hong bawlsak pah hi. Zomite’ tangthu ah i mangnglih ngeiloh ding maulsuang khat na hipah hi.

Tu hun ciang, Zolai tawh kigelh Laisiangtho bek hi loin, thu le la tuamtuam kigelh laibu tampi kinei ta hi. Zogamah Lungdamna thu hong tung zawh kum (100) cinna pawi kikham khin a, Zomite sung pan mipil, misiam tampi tak kiom ta hi. Mipil, Misiam i neih zah tawh tehkak leng, Zolai tawh kibawl laibu sim ding tam het lo hi cileng, kikhial lo ding hi. Hun luanzia tawh kizui-in (Social media ) tungtawnin thu le la tuamtuam kigelhin zolai khangto na khat ahih manin, I zat siam ding zong kisam hi.

Minam khat i hihna tawh kizui-in Lai tawh nasepna thupi le tangzaizaw a, I sep theih nading le i ngeina, Pau le Lai a mangthang loh nadingin zolai tan (4) ciang tawh din’ khawl lo-in Doctorate ciang dong sin zawhna dingin puahin, zuunin I zat ding pen Zomi zosuan tate kua mah peuh ii mawhpuak khat ahi hi.