Pasian pen phat dinga kilawm ahi hi. Ama hihna le ama bawlsa nate hangin phat ding ahi hi. Ama Siangthona phat ding ahi hi. Tua manin misiangthote, vantungmite le seraphim-te in suun tawh zaan tawh phat uh hi, ci-in Lai Siangtho in hong gen hi. “A beisa, tuhun, le a tawntungin a om Vanglian Topa Pasian, siangtho hi, siangtho hi, siangtho hi,” ci-in kiko uh hi. (Maangmuhna 4:8)

Leitungah Pasian i phatna pen vantung ading a, kisin khol ihi hi. Sia khat in a thuhilhna ah “Phatna biakpiakna ah nop a sa lote adingin vantung pen haksa-in gimhuai mahmah ding hi. Banghang hiam cih leh, vantungah i nasep ding pen suun le zaanin Pasian phat ding ahi hi,” ci hi. La makaite bang in  (A tung takpi uh leh)  nuam sa mahmah ding dan ahi hi. Vantung ah muzik kitum ding lam kigen lo  ahih manin Pa Khuppite, Pa Tualno-te pawl in nop sa lo kha mai ding uh hi.)

Ama hoihna, ama hihna, ama itna, ama hehpihna le ama vanliatnate lungngai leng, “Phat loh theih loh, diang loh theih loh” ahi hi.  Tu-in i tel gaih nai lo hangin, ni khat ni ciang i tel gai ding hi. Tu-in hong liahthei pumpi tawh i om a, ama kiang i tung ciangin hong liah hong dalteng beimang ding hi. Tua hun ciangin i mit tawh mu-in, i bil tawh za-in, i khut tawh i lawng ding hi.

Tua manin, tu-in i tel gaih nailoh hangin upna le lametna tawh i phat hi. I telna zahzah tawh phat ihih manin a laam dan, i phat dan zong a kilamdang ahi hi. I teldan zong kibang lo ahih manin i phatzia zong tuampian thei hi. Ahi zongin, i telgaih ni ciangin i laamdan, i phatzaite taih kul loin hong kihual hong kituak lel ding hi.

Endikpawl