Gimna Lianpi a masa hun sangin a nunung hun sungin lauhuai zawin thuakhak zaw ding hi. Tuiso kisuang bang hi leh, tui satna a lang panin hong phulkhiat dong hong sa to semsem ding hi. A hun kiciangtan sa khengin gimna kizom toto ding hi leh, kuamah in thuakzolo in kinungta zo lo ding hi, cih Lai Siangtho (Matt 24:22) in gen hi.

AntiKhazih Ukna Hun: Israel tawh a kamciam Antikhazih in hong palsat ciangin a nunung Gimna Lianpi kum 3 ½ kipatna ahi hi. Antikhazih in ‘leitung kiukna le biakpiakna lamah ukcip ding hi ing’ cih pulakna hong nei ding hi (Dan 9:27; Matt 24:15). Leitung bup in amah bia dingin hong sawl ding hi (Dan 11:36-38; II Thes 2:4; Mang 13:8, 15). Antikhazih le ama ukna nuai a-om kumpi sawm-te in a maanlo leitung biakpiakna pawlpi (the false world church) hong susia piikpeek ding uh hi (Mang 17:16-17). Antikhazih in Judah biakinnpi sung niinsakin ganhing biakpiakna hong khawlsak ding hi. Biakpiakna kici dang khempeuh a khawlsak khit ciangin Pasian dinmun ah amah hong kikoih tawm in Judah Biakinnpi sungah hong tu ding a, ‘kei Pasian hi ing, kei bek hong bia ta un!’ ci ding hi. Hih hun nunung sung thuakhak mahmah ding ahih manin ‘tuazah in leitung piancil panin a lauhuai zaw om lo ding a, zong om ngei nawnlo ding hi’ (Matt 24:15-21). “Tua nite kitomsak hi kei leh, mihing kuamah suakta zo lo ding hi. Teelsate hangin tua nite kitomsak ding hi” (Matt 24:22) ci hi. Pasian in kum 3 ½ sawt dingin a geelsa hi kei leh, tua gimna nite a pai suaksuak ding hi leh kuamah in thuakzo hetlo ding hi, cihnopna hi. Pasian’ tatsa mite hangin kum 3 ½ bek a sawt ding ahi hi. Tua tan zong thuakbaih hetlo ding hi. Antikhazih (ganhing) le Zuaukhem Kamsang in thusiabawl a peengte (diabolical duo) ahi uh hi. Gulpi (the Dragron/Satan/Devil a kici), Ganpi (the Beast-Antikhazih a kici) le Zuaukhem Kamsang (the False Prophet a kici) teng thum in Thumgawm Dawimangpite (Satanic Trinity) ahi uhi. Hih Thumgawm Dawimangpite in Gimna nunung hun sungin hong kipei in leitung ah a sia thei pen siatnate hong bawl ding hi. A phadeuh in, thu-umte nakpi takin hong bawlsia ding uh hi.

Ganhing Ciaptehna (666): Lai Siangtho sungah numbat a zatna tuamtuam om hi. 666 in mihing numbat kici hi. Ni guk ni in Pasian in mihingte bawl hi. Ni guk nasem ding thu hong kipia hi. Numbat 666 in a kigimneih nambat hi. Phone, inn le motor license numbat dingin kideih hetlo tek hi. Numbat 6 in kicinlohna (incompleteness) lakin Pasian numbat 7 in kicinna (completeness) lak hi. Mihing mawhna tawh a puk a kipanin mihingte nungtakna ah ‘a kisam khat’ om tawntung hi. Tua kisapna in Jesuh sung bekah om hi. Numbat 666 in Antikhazih min ciaptehna nambat hi. A pan Z dong laimalte’ ciaptehna nambat in a kizat ciangin gematria kici hi. Hih Sapi Numbat in Antikhazih min sungah kihel laimalte nambat kigawm ciangin in 666 pha ding hi, cih lahna hi. Mangmuhna 13:16-17 ah “Tua ganhing in … mi khempeuh in a taklam khut tung uh ahih kei leh a taltang uhah ciaptehna a neih nadingun thu a pia hi. 17Tua ahih manin tua ganhing min ahih kei leh a min tangin a nambat ciaptehna (666) a tungah a nei lo mi peuhmah, vanlei vanzuakin paikhia thei lo uh hi” ci hi. Gimna Lianpi hun nunung sungin hih sapi nambat 666 a pum tungah a suang lote in neek-le-dawn a kipan vanzuak-vanlei theilo ding uh hi. Neekledawn ding om loin a sawtsawt ciangin a puksi mi tampi om ding hi. Tuhun ciangin microchips le sensors tuamtuam kizangh mahmah ta hi. Hihte in nuntakzia olzaw le lemzawsak zaw hi. Tua hangin mi tampi in mimal thusim le mimal account tuamtuamte, zumte le ziipainate ah sumzuak-sumlei bawlna ah kipia ngam lel ta hi. Antikhazih in hihte hong zangh ding maw? Hihte sangin a hoihzaw hong zang lai ding maw? cih kigen khol theilo hi. A kigen khol thei khat in Antikhazih hun ciangin nambat 666 ciaptehna zanghin mite ukcipin gakcip ding cih kimu khol gige ta hi. Tal tung ahi-a khut tung ahi zongin, pumpi tung mun khat peuhpeuh ah sapi ciaptehna ama nungzuite in zatloh phamawh hi. Pasian thu upna hangin a zangh nuamlote in bawlsiatna pan sihna dong thuak ding uh hi.

Pasian’ Hehna Haite Kibuakna: Vantungmi sagihte kiangah “Leitungah va pai unla, hai sungah a om Pasian’ hehnate va sungkhia un” (Mang 16:1) cih kisawl hi. Hehna Hai masa leitungah vangtungmi in vabung a, ganhing ciaptehna a neite le a lim a biate tungah a kihhuai mahmah meima piang hi (Mang 16:2). Hai nihna vantungmi in tuipi tungah hong bung a, tuipi tuite sisan tawh kibang in tuipi sung nuntakna a nei khempeuh sigai ding hi (Mang 16:3). Hai thumna vantungmi in hong bung in gunte le tuinakte’ tui khempeuh sisan hong suak hi (Mang 16:4). Leitung bangzahin kihhuai-in namsiam ding a, tui dawn ding om lo ding ahih manin thuakhak mahmah ding hi. Hai lina ni tungah kibung a, ni in a satna tawh mite kanggawp ahih hangin mite a lungsim uh kisik tuanloin khauhsak semsem zawin Pasian samsia zawlai uh hi (Mang 16:8-9; Mal 4:1). Hai ngana ganhing tokhom tungah hong kibung a, ganhing’ ukna gam sung teng khuamial cip ahih manin, mite’n nasa lua hagawi liang ahih hangin kisiik tuanloin Pasian samsia zawlai uh hi (Mang 16:10). Mihing lungsim a khauhzia in Pasian langpanna ah nasia mahmah cih kimu thei hi. Dawi nasepna nam khat ahi hi.

Armageddon Galkidona (Hehna Hai Gukna): A gukna hai Eufratis Gunpi tungah kibua in guntui kangcip pah hi (Mang 16:12). Hih gunpi in tanglai pekpanin leitung nisuahna le nitumna kigi-khenna in kiciamteh hi. Hih gunpi in a lang le a lang ah tanglai pekpanin galkidona a dongtang sak khat hi. Tun keucip ahih manin tai 1800 a sauna kuampi in nisuahna le nitumna a om galte suakta takin kileh kawikawi theisak ding hi. Armageddon galpi hong kipatna ding hi ta hi. Armageddon cih kammal in ‘Megiddo Mual’ (Hebrew kam Har-Megiddon) a cihna hi. Megiddo kammal in ‘kithahna’ cihna hi-a, kithahna mual hipah hi. Jerusalem nitumnalam tai 60 gamlatna ah om hi. Megiddo a sauna tai 20, a zaina tai 14 pha hi. Leitung galhang minthang mahmah Napoleon in Megiddo Mual pen “Leitung Gal Kidona Tual Lianpen Hi” cih genngei kici hi. Thuciam Lui hunin Deborah, Gideon, Saul, Ahaziah le Josiah te’n galdona mun in a zat khat uh hi. Armageddon galpi in leitung galpite lakah a nasia pen khat hi ding hi. Gimna Lianpi a bei madeuh le Khazih van pan hong kumsuk madeuhin hih galpi piang ding hi. Thumgawm Dawimangpite’ (Satan, Antikhazih le Zuaukhem Kamsang-te Satanic Trinity kici) kam sung panin uiphuuk meelpua dawigilo thum hong pusuak khia in nalamdang bawlin a Vanglian Pasian a do dingin Megiddo Mual ah leitung thunei kumpite hong kaikhawm ding hi (Mang 16:14, 16). Leitawlam galkap honpite, leikhunglam galkap honpite le nisuahnalam galkap honpite kikaikhawm in Israel hong simhuan-dohuan ding uh hi (Dan 11:40-45; Mang 16:13-21). Bang hangin gam neu mahmah Israel gam leltak leitung gam tampite in do nuam ding uh ahiam? Pasian in a teeltuam minam ahih man le Pasian a langpangna uh kilangsak nading ngimna hi ding hi. Antikhazih in Satan tawh kikop in mite tungah Israel muhdahna lungsim sinsona piangsak ding hi. Nisuahnalam galkap honpite in Israel gam dong hong tun phei theih nadingin Eupharates Gun hong kikangkeu sak ding hi (Is 11:15; Mang 16:12). Satan khemna hangin leitung kumpite in leitung vangliatna a ngah nadingin galdo dingin kisatsuah ding uh hi. Ahih hangin van pan Jesuh Khazih tawh a tonkhawm galkap honpite a do ding ahih lam uh kithei kha lo uh hi (Mang 19:14). A kisim zolo mi million tampi si ding uhi. Galdona panin misiluangte’ sisan luangkhia in “sakol kamkaih ciang banin tai 200 dong a luang hi” (Mang 14:20) ci hi.

Babylon tung Thukhenna (Hehna Hai Sagihna): Hehna Hai sagihna hong kibuak ciangin “Kiman khinzo hi” (Mang 16:17) cih kikona vantung biakinnpi tokhom panin hong gingkhia hi. Kiman khinzo hi a cihna in sepdingte (thukhen dingte) kiman khinta in a tawpna a tungta hi, cihnopna hi. Pasian hehna haite Satan ukna le a thapia nungzuite tungah kibua suk hi. Hong dingkik Babylon gam hong kisuzan ding hi (Mang 17-18). Babylon in koi mun ah hong dingkik ding ahiam? cih theihnop huai hi. Pawlkhat in tanglai Bablylon Gam mun ahi Iraq pan mahin hong ding kik dingin um hi. Saddam Hussein in a gam nakpuah mahmah in hong khantoh mahmah hun sungin Babylon gam hong ding kik dingin kilamen man hi. Tua lametna Saddam tawh kivui khawm hi. Pawlkhat in Babylon thak in Europe kipawlna gamte (European Union) hi dingin um hi. A Dingkik Zawma Empire (Revived Roman Empire) hi, a ci zong om hi. A mun lian ding a kigen kholh theih kei hangin Babylon’ gitloh lungsimpua gam khat hi-in Satan le Antikhazih in phualpi in a zatna mun hi ding, cih kigen thei hi. Gimna Lianpi nunung hun sungin Antikhazih in a galkap phualpi dingin Israel pan Babylon ah hong tuah ding hi. Antikhazih le a galkapte in Israel do dingin hong kipat ciangin Pasian in Antikhazih Babylon phualpite galkap honkhat hong dosak vat ding hi. Babylon a kisuksiatzia ding a kigenkholhna hih bang ahi hi: “Kumpi gam khempeuh lak ah a vanglian pen Babylon Gam Pasian in a suksiat ciangin Sodom le Gomorrah kisuksiat bang ding” (Is 13:19) a, “kua mah teengthei nawnlo in kuamah zong zin nawnlo ding hi” (Jer 50:40) ci hi. Nitumnalam pan gam tampi kigawm in Babylon hong dohuan ding uh hi (Jer 50:9). Babylon khuapi in suksiatna a ngahna ahangin “kamsangte le mi siangtho a kithatte’ sisan le leitungah a kithat mi khempeuh’ sisan nangma sungah a kimuhna hang ahi hi” (Mang 18:24) ci hi. Satan in molhtum in a zat a kungpi-zungpite le a hiangkate khempeuh a zung pan kilongkhia in kisuasia khin ding hi. A biakna zungpi ahi a paktat numei (Mang 17), a gamthu le sumlei-sumzuakna zungpi ahi Babylon (Mang18) le a galkap zungpi khempeuh kisuasia khin ding hi (Mang 19). Leitung pianzawh a nasia pen zinling in Babylon khua phel thum kisuahin, minam tuamtuamte’ khuapite zong cimzan gai ding hi. Tuikulh le mual khempeuh bei maimang khinin, a gik lua mahmah tangkhat ciang talent khat (125 lb) a gik gialpi kia beh lai ding hi. Tua gimna a thuakhak mahmah hangin mite kisik tuanlo lai-in Pasian kosia zaw lai ding uh hi (Mang 16:18-21). Babylon a kisuksiat hunin Anikhazih khua sungah om kha lo a, a khuapi kisuksiatna a zaak ciangin a heh semsem hi. A khuapi a susia nitumnalam gakapte do kik ding sangin, Israel a suksiat ding ngimna mah bulphuh in Israel hong do hi (Zecha 12:1-3). Zechariah 14:2 ah “Gam khempeuh kaikhawm in Jerusalem ka do sak ding hi” ci hi. Jerusalem kisusia in mi tampi si ding hi.

Jerusalem ah a om khalo tua hun ma-in galtai Jewmite a omna ah a do dingin Antikhazih hong kipan veve lai hi. Mangmuhna 12: 6, 14 ah Gimna Lianpi laizang hun in Antikhazih in a thuciamna a palsat khit ciangin galtai Jewte’ thu kigen hi. Numei a kici pen in Israel cihna hi. Pasian in a koihsakna mun ah kum 3 ½ sung lungmuang takin bu thei uh hi. Antikhazih in gamlak a bukna uh ah Jewte do dingin a galkapate hong kaikhawm hi. Patau mahmah in belh-ding suan-ding dang a neilo tua Jewmite in a cihmawh mahmah uh hi. Taina le bukna ding dang om tuanlo ahih manin hong kisikkikin Messiah lam ah hong kihei uh hi (Hosea 6:1-3). Jew makaite hong kisikin, Topa kiang zuat ding a mipite a hanthot khit uh ni nih khit ciangin, a vekpi un hong kisik ding uh hi. Pasian a nungngat hangun gimna lianpi a nawkkha uh ahih lam hong kiphawk uh hi. Topa in a kikona uh hong za in amaute a huh dingin Khazih thakhat in hong kumsuk hi. Khazih hong kumsuk in Antikhazih le a galkapte a kam pan a hiam thalthang tawh thakhat thu in ong that mang ding hi (Mang (19:11-16). Israel a langdo khempeuh le antikhazih mahmah Khazih in hong thatkhin ding hi (Hab 3:13; II Thes 2:8). Bozrah gammang tulak pan Israel kikal ah a om Antikhazih galkapte khempeuh Khazih in thakhat in that mang khin ding hi (Joel 3:12-13; Zech 14:12-15; Mang 14:19-20).

Thukhupna: Hih gimna lianpi hun sungin Satan le a nungzuite in thu-umite bawlsia in sisan naisan luangin gilkial dangtakin puuksi sak ding uh hi. Mat le hen thuaksakin sisak ding uh hi.  Upna hangin sihna a thuak thu-um tampi om ding hi. A upna uh le a hangsanna uh hangin paaktat huai mahmah hi. Hih hunsia sungah omkha uh ahih manin thu-ummi khat ahihna hangin thuakloh a phamawh pawlkhat om hi. Ahi zongin, Jesuh ama Topa le Honpa in a sangte in hih Gimna Lianpi nawkkha lo ding uh hi. Jesuh sungah gupkhiatna ngahna lungmuamna a nei nailote in Topa tungah a thakin ki-apin i nuntakna kisittel ciat ni. Gimna Lianpi sungah haksatnate thuak hak mahmah ding hi. Tuate sangin a thuak hak zaw ding in Hell sung gimna lianpite ahi hi. Jewmite bangin i lungsim a khauhlai a om leh, Topa lam ah kihei ni, a hun om lai hi. Hih gimnate panin hong honkhia ding hong pai Pa in Jesuh Khazih ahi hi. Nang thuak ding teng singlamteh tungah hong thuaksak khin zo hi. Na up leh na sanziau ding bek ahi hi.  John 3:16, 18 ah “Pasian in a tapa khat neihsun a piak dongin leitung mite a it hi. Tua Tapa a um mi khempeuh in sihna thuak loin nuntak tawntungna a ngahna ding uh hi… Amah a um peuh in thukhenna thuak lo ding a, a mah a umlo peuh in thukhenna a thuak khin zo hi” ci hi. Jesuh um in Jesuh sungah a omkhinte adingin i gensa gimna lianpite  kithuak khalo ding hi,  cih i um hi. A kituakkha ding gimna a omte zong, Jesuh i belh suangpi sungah bu peuhleng lungmuan huai pen hi. Jesuh um in Ama sungah omin Amah ei sungah hong omin hong teeng leh, gimna kici peuhpeuh nawk zawh nading thahatna le hehpihna kicing Topa in hong pia ding hi. Topa minthang vanglian tawntung ta hen! Amen. 