Kum 2006 Kha & Ni ..? in Rome 12:2 na Lai Siangtho bulphuh in pumpi’ deihna ahi, Zu, Za, Khaini duhna pan ka pumpi mahmah kipumkhel ding lungsim khensatna ka nei hi.
Kum 2007 November 18, Sunday ni-in Pastor Rev. Cin Khan Suan in Jesuh ka Gumpa le Honpa in a um mi khat ka hihna hangin Jesuh in a nungzuite a sawl (Matthew 28:19) bangin Pa, Tapa, Kha Siangtho min tawh tuisungah hong phum hi.

Ka Nu le Pa pen a neutung pan un, Lawki (dawibia) Innkuan pan Tapidaw (Christian) a na tangsuahte-uh ahi uhhi. Tua lai-in i Zogam ah Tuiphum (ABM) bek om hi. Ka Nu le Pa a neutung panun Khristian a tangsuah uh ahih manun, keizong Automatic in Khristian mi khat ka hi pah a, Khristian Innkuan pan a khangkhia ka hi pong hi. Lawki(dawibia) Innkuan pan khangkhia kihi lo bek a, ka nuntak, gamtat, kampau le ka omdan pen Lawki(dawibia,milimbia) te sangin ka hoih kei zawlai liang hi. Kei le kei ka nuntakna pen manh nei ka kisa het kei mai hi. Kipumkhel zawhna taktak ka nei thei kei hi.

Hici bang nuntakna pen piang kei, kei zong mite bangin TOPA hoihna phat in, gennuam si’ng ee., kei zong ka lungdamna khituite luang khia ziahziah in TOPA’ ompihnate ngah nuam si’ng ee., keizong Huhpa Kha Siangtho ngah nuam si’ng ee., keizong piangthak taktak nuam si’ng ee., ei zong…, kei zong…., ci-in Huhpa Kha Siangtho ngah ding bekbek ka lunggulh ngeungau ta hi.

Hih ka lunggulhna PASIAN in hong thei-in UNITED YOUTH CONFERENCE #2 Kum 2016 July 9, Saturday 9:30pm-10:00pm sungin PASIAN’ mizat mahmah Pastor Zaw Lin Aung’ tungtawn in Pentecost Ni Sawltak 2na sung a, nungzuite’ tung le mitampite’ tung a, kibua Huhpa Kha Siangtho tawh ciaptehna, kiphum(Baptized)na ka ngah ta hi. Ka nuntakna manh nei ka sa thei taktak ta hi. HALLELUJAH-7 AMEN-7.
Hih ka ngah Huhpa Kha Siangtho pen Jesuh a um mite khempeuh in a ngah ding hi napi, kingah pah ziau samlo a, lunggulh ngiat kul ahi hi. A lunggulhte’n a kingah peelmawh ding hi leuleu hi. Na ngah Ni Ni-in na lungsim nopna pen genzawhloh zahdong liangin hong nop ding hi ta hi. Tua dingin mimal kim i kideihsak uhhi. Teci pang kal ding kingaklah den keei mai ahi hi. John 14:16-27, 1 John 2:27, Rom 8:1-28, Kolose 2:1-23, 3:5-25, 4:1-6.

April 26,2020 Sunday in i Pawlpi (ZAC) Facebook pan Live khahin kicing takin Huhpa Kha Siangtho tawh kidim nuntakna ngah in KHAZIH’ mi khat ka hihna Teci ka pangtheih khak zong angtang le lungdam mahmah ing. Pa PASIAN’ tung, Pawlpi Siate, Upate, Pawlpi mi khempeuh tung le Media pute’ tungah ka lungdamna ka ciamteh hi.

Tu’n zong ZAC-AD Volume 13 na-ah Teci pangtheihna ka ngah khak manin nakpi takin ka lungdam a, makaite’ tung le Pa PASIAN’ tungah ka lungdam mahmah hi. Pa PASIAN’ minthan semsem nading le a Kumpi gam zai semsem nadingin hi zawngiat tahen, ci-in Jesuh’ min tawh ka lungdeihna ka pulak khia hi. ZAC-AD ah mapang kha khempeuh zong TOPA’n ama’ min thupi nading le a kumpi gam zai semsem nadingin hong zangh toto lai ngiat ding hi.

Khazih le Pawlpi ading Lawp mahmahna tawh mapang khawm den ni.

Ka lungdam,
Sian’ Sawmpi
Ph & Vb: 815-889-2017