Lai-at: Nu Zonu

Jesuh gumpa le Topa a kasan zawh mah, a beisa kum tampi tak sung kei piangthak khinta, vantung gam tung ding, ci-in khamuang mahmahin, kei bek mah lungnuam takin omin, kuamah ka vei se kei hi. 2020 pan Far East Bible College (FEBC) sang ong kihongin ka kah a, tua ah Khristian nuntakna  tampi tak ka sin to hi.  Tua pan ka mit ong vakin Pasian in  ka gamgi  ong keksak hi. Kei bek cihna pan mi khempeuh huam zoin a tunga i gensa mah bangin leitung mi khempeuh ading Jesuh si ahih lam ka tel thak a, mi khempeuh ka itna hong khang hi.

I sungah Pasian ong itna i tel taktak ciang bekin midangte ki-it zo hi. Tu laitak a, i Kawlgam thupiangte ngaihsun leng, (hua mipa) tungah i hehsuak mahmah hi. Aizong, amaute ading a zong Jesuh ong si hi mawk hi. Amau thei het loin a hehpih huai mahmah ahih man un, thunget saksak dingte ahi uh hi. (Na KHA mit tawh na en in). I it zawh nailoh mi a om hiam? Dai takin Pasian’ itna ngaihsut dih in. It taak lo pipi, ei lel tak hong it i Pasian ahi hi. Tua, nang ong it bang lianin, na pam a, na it zawhloh khat Aman na it zen hi. Tua itna taktak na sungah a om leh, na itzawh loh ding kuamah om lo hi. Topa’n i gamgi ong keksak ngiat tahen! I Pa sunin, Ama’ itte it zo-in, Amah tawh i kibat dong hanciam toto khawm ni. Laisim mimal kim Topa ong hopih ngiat ta hen!