Jesuh a Neite Kikhel

Jesuh a nei lo nuntakna pen LST in “thanem”, “mawhnei”, “Pasian gal”, le “misi” ci-in hong na ciamteh a (cf. Rom 5:6-11; Efe 2:1), dai takin ngaihsun pak leng zong Jesuh kihel lo nuntakna pen a dinmun uh ‘siahuai mahmah’ cih bekin zong gen khin zo lo hi. Ahi zongin Jesuh a nei khinte ahihleh nuntakna thak nei-in Pasian mi, Pasian innkuan hi ta a, tua banah “gualzo pente hi” ci-in hong kiciamteh lailai hi. Jesuh a neite pen nuntakna thak bek hi lo-in nuntakna cingtaak a neite ci sawnsawn a, mi hampha pente hi.

Sang ah (biology class khawng ah) nuntakna a neite thu (living things) hong kisinsak ciang, nuntakna a nei khat pen gamtang hi, kikhel hi, khangto hi ci-in hong kisinsak zel hi. Hih thu pen kha thu tawh zong a kituak mahmah thu khat hi. Pasian tawh kizopna a nei mite in nuntakna thak nei uh a, amaute gamtang-in, kikhel-in, khangto uh hi.

Khat vei Charles Spurgeon (1843 – 1892) pen England khua sung khat ah vak hi. Amah pen Pasian mizat mahmah khat hi a, mun tuamtuam ah Cialpi bawlin a manlah den khat hi. Tua a vakna lampi kiang khat pan zukham khat in na hopih a, “Sia aw, kei na Cialpi bawlna pana a piangthak khat hi ing” ci-in a khut na len hi. Spurgeon in tua mipa khut a let kawm limtak enin, hici’n dawng hi, “Kei kong pianthak sak na hih manin hici’n zu khawng a khamkham lai na hi hi. Pasian Kha Siangtho in a pianthaksak na hi kha lecin hi ciang dinmun bekah na om kei ding hi” na ci hi. Pasian Kha Siangtho in a pianthak sakte pen kikhelin kilamdang uh a, khangto uh hi. Thakhat thu in bucing pah uh cih bel hi lo a, ahizongin mainawt uh hi.

Khristiante Mungtup (Goal) Taktak?

Ei Zomi sungah gupkhiatna thu a kigen ciang, vangam tun ding kithupi gen mahmah hi. Tua man mahin zong i Khristian nuntakna ii mungtup pen tampi takin vangam tun ding ciang bek kisa kha a, tua in i kha lam khantohna ding tampi in hong dal hi. Bangci in? Kibawlphatna ding zongsatna hoih lo (gtn. zateep, zu dawn etc.) khawng gen leng, “… a tua vangam tanna ding lah hi lo a” cih tawh ei le ei i kimaisak a, thu haksa khat peuhpeuh vangam tan le tan loh ding tawh i saikak pahpah hi. Mawhna lah taisan nuam lo, ahizongin vangam lah tan nuam sam lo-in laklawh takin a phei len mi kitam hi.

Hih dan thute hangin William Booth in ana gen theih zel, “Khris kihel lo Khristianna; mawh kisikna kihel lo mawh maisakna; le kikhelna kihel lo pianthakna” cih bang dinmun a tung khin kitam mahmah hi. “Vangam i tun lieiliai naak leh” cih tawh i kikhamuan tawm a, Khris nungzui muanhuai hih ding khawng pen i Siate, makaite, le a hanciam zote ading bekin kikoih kha hi. Jesuh in mi khempeuh ama nungzui muanhuai ahi dinga hong sapna tawh kilehbulh lian hi!

Lai Siangtho sung thu limtak i hong sut ciang, ei Khristiante adingin vangam pen i tunna ding mun (destination) hi mah a, ahizongin i mungtup (goal) taktak pen bel Khris lim- le-mel sut semsem ding hi. Kha lamah i khantoh semsem tawh kituakin ani ani in Jesuh i sut semsem ding pen ama deihna le lungkimna hi. Amah mitsuan kawmin i kalsuanna ah amah mahin tua dingin hong na puah toto nana hi hi (cf. 2 Korin 3:10).

Sawltak Paul in nauvei bangin ana vei thu khat om a, tua pen thu-um mite sungah Jesuh lim hong kilat semsem ding vei penin na nei hi (cf. Gal. 4:19). Mun dang khat ah, Jesuh a neite pen ama lim-le-mel a sun dingin lei pian mapek nangawnin hong kiteel khin ahihna zong na gen hi (cf. Rom 8:29). Jesu lim-le-mel suun i cih ciang, Jesuh hihna pen Sawltak Paul in kha gahte a genna sungah kicing pen kha ding hi (cf. Gal. 5:22-23). Kha gahte i nuntakna ah hong kilat semsem ciang Khris lim-le-mel a sun semsem kihi pah ding hi.

Kha Lam Khantohna Ding

Kha lam khantohna ding akl. Khris lim-le-mel sut semsemna i gen laitakin tua bang dinmun bangci tun theih ding cih genloh phamawh hi. A lungdamhuai thu khat ah, i mungtup i tunna dingin Pasian in i kisap khempeuh hong na vaihawmsak khin dimdiam hi. Khris lim- le-mel sut semsem nadingin i kisap thute:

1. Kha Siangtho panpihna: I gupkhiatna limlim pen a patna pan a tawpna dong Pasian Kha Siangtho nasep ahi hi. Amah mahin ma hong panin na hong sepsak ahihmanin hih ciang dinmun a tung thei i hi bek hi. Kha Siangtho panpihna lo tawh kha thu ah koi mah tan i tung kei ding hi. Tua manin i nuntakna ah Kha Siangtho dahsak lo-in i kimakaihsak den ding thupi hi. (cf. Jn 3:5; Rom 8:10-13; Gal. 5:22-26)
2. Kha Lam Kikhalna (Spiritual Disciplines): Kikhalna om lo-in khantohna om thei lo hi. Kha lam khantohna pen amah a hong piangtawm (automatic) hi lo a, khensatna kician nei-in en zong i hanciam kisam hi. Thuciam Thak sungah hanthotna mun tampi ah i muh pen – i kha lam khantohna dingin i hanciam ding hi. Pasian hehpihna le mihing hanciamna pen kikawkalh lo a, i thalawh sawmna pen tawh a kikawkalh hi bek hi (Dallas Willard). (cf. Col. 3:12-17; 2 Pet 1:5-10)

Kha lam kikhalna nam tuamtuam om a, a thupi diakte ah: 1) Nisim Pasian tawh kihona (thungetna); 2) Nisim Pasian Aw ngaihna (Lai Siangtho simna), 3) Nisim Pasian mite tawh kikhawlhna (fellowship), leh 4) Nisim Mawhna Nial cihte ahi hi.

3. Nuntak haksatna le ze-etna tuamtuamte: Nuntakna ah i mikim in i tuah pelmawh haksatna le ze-etna tuamtuamte in zong pen i kha lam khantohna dingin hong huh penpente suak thei hi. I tuah thu haksate in kha lamah i picinna dingin hong na seksek hi thei hi (cf. James 1:2-4; Rom 6:1-15).
4. Pasian mite: “Sik in sik mah hiam sak thei a, mi in mi mah pilsak thei” cih thu Paunak 27:17 sungah i mu hi. I kha lam khantohna dingin zong Pasian mi lawm hoih tampi i kisam hi. I kikhawlhpih lawmte panin i hihna kimu thei a, i mailam ding zong kigen thei hi. Pasian thu ah i khantoh nop semsem leh, tua lampi ah hong kitonpih thei ding le hong makaih thei ding lawm hoih tampi (Pasian mite) i kisam tawntung hi (cf. Prov. 27:17; Heb. 10:25).