Rev. Pau Lian Mang, D.Theol.

Nong pai ciangin Troas khua Carpus’ kianga ka nusiat ka puantual le

laihualte, a diakdiakin savun laidalte, hong keng in. (2Tim. 4:13)

Laisimna in thu tawh hong kidimsak a, thugenna in a kigingsa hong

suaksakin laigelhna in mi kician hong suaksak hi.

Reading maketh a full man; conference, a ready man;

and writing an exact man. (Francis Bacon)

Lai cih pen leitung mihingte’  neih van-gilte lakah a manphapen khat ahi hi. Lai tawh thulela kizasak thei i hih manin kimaingapna le sepkhopna khangsak hi. Lai tawh thulela kiciamteh thei ahih manin thutheihna kibehlap hi. Lai tawh pilna kisin thei ahih manin nuntak khuasakzia nakpi khangto hi. Lai cih pen mihingte’ adingin a thupi mahmah, neihloh a phamawh vanzat khat ahi hi.

Ei Khristiante zong leitung mihing mah i hih manin i Khristian nuntakna le nasepna ah lai mah a thupipen khat ahi hi. Tua ahih manin Khristian lai nasep a thupitzia thu, tawm i kikum ding hi. Khristian bup huamin gen ding hi lehang zai lua ding ahih manin Zomi sung, ahihkeileh  Zolai tawh nasepna i bulphuh deuh ding hi.

“Lai” A Khiatna

Zopau kammal “lai” cih ciangin khiatna tuamtuam huam thei hi.

Khatna ah, a kigenkhia kammal teng gelhkhiat nadinga kizang lai (script, writing) gennopna hi. Zopau-in malnei lai ci-in phuak pak ni. A tunga i gen, mihingte’ adinga van-gil a manphapen, i cih pen ahi hi.

Nihna ah, tua malnei lai (script) tawh thulela dangte i sin ciangin tua zong lai mah i ci hi. A taktakin tua pen malnei lai a sin hi nawnlo-in tua lai tawh pilna tuamtuam a kisin hi zaw hi. Tua hangin pilsinna lai cih ding hizaw pian hi. Sinna phual pen sang (school) hi deuh ahih manin sanglai zong i ci hi.

Thumna ah, a theihhuai thulela tuamtuamte a lunglut-huai theithei dingin malnei lai (script) zangin i gelh i gualh pen hi a, Mangpau-in “literature” a kici pen ahi hi. Hih zong Zopau-in gelhlegualh ci-in min i phuak pak ding hi.

Hih sungah a tunga lai nam thum teng, (1) malnei lai (script),  pilsinna lai ahkl. sanglai pilsianna (formal education), gelhlegualh (literature), a huamin i gen ding hi. Ahi zongin i kikupnop ahihleh a thumna ahi, gelhlegualh (literature) thu hi deuh hi.

Khristiante le Lai Kinahvawhzia

Tu ma kum 3000 val lai hun, Israel mite Egypt gam pan a paikhiat lai-un Moses in Pasian’ kiang panin lai kigelh suangpek (thukhun 10te) na ngah hi. Bekthamlo, amahmah in zong lai na gelh hi (Joh. 5:46-47). Lai nasep kizom suaksuak a, khut tawh a kigelh, a nung ciangin Lai Siangtho ahiding ahi, khutgelh laite tampi hong piang hi. Tuate a khang a khangin na kitei toto a, hun khat ciangin tuate sittelna/haihkhiatna (canonization) kibawlin “Lai Siangtho” hong piang ahi hi.

Judah biakna siksakin hong piangkhia Khristian upna zong lai mah tawh na kinahvawh toto hi. Topa Jesu a thawhkhik khit, van a kah khit ciangin sawltakpite in Kha Siangtho’ makaihna tawh mun citeng ah Topa Jesu’ Lungdamna thu tangkokhia uh hi. Kam tawh genkhia pulak uh a, lai tawh zong gentel hilhcian uh hi. A sawt ciangin tua laite “Lai Siangtho” hong suak leuleu hi. A omsa, Judah biakna sunga kizang Lai Siangtho pen “Thuciam Lui” kici-in a om thak, sawltakpite’ laigelh laikhak teng “Thuciam Thak” kici hi.

Hih, Thuciam Lui le Thuciam Thak, nih kigawmin khat a kisuah Lai Siangtho pen ei Khristiante in bulletpi-in i neih ahi hi. Kha thu ah tha kidip nading i kha ansal hi a, upna thu ah a khial a maan i khentel nadingin a thunei pen ahi hi. Tua bangin Lai Siangtho bekbek bulphuh i hih manin Muslimte bang in ei Khristiante pen “Laibu Bulphuh Mite” (People of  the Book) hong ci liang uh hi.

Zomite le Malnei Lai

Zomite in tanglai pek pan pau (spoken language) i neih hangin lai (hih mun ah malnei lai — script, written language) ahihleh tu ma kum 100 val deuh panin i nei pan hi.

I neih masak pen Laipian Lai hi a, Pu Pau Cin Hau (1859-1948) in Pasian’ piak maangmuhna tawh a phuatkhiat ahi hi. Pu Pau Cin Hau in lai bek hi lo, biakna thak khat zong phuankhia a, tua zong Laipian biakna kici pah hi. Laipian lai le Laipian biakna pen Tedim, Tonzang le Falam gam dong ah kizel hi. Galpi Khatna (1914-18) sung, 1917 kumin Mangkang gam-uk kumpipawl’ sawlna tawh Piancit (France) ah Vannawn Galkap (Labour Corp) sem dinga pai Zomi tangvalte bang Laipian lai tawh innlam-ate laikhak tangtang uh, kici hi.

Lai i neih i nihna pen America pana hong pai, Zomite in Sangmangpa ahkl. Cope Topa ci-a a lawh uh, Khristian gamthak nasem Rev. Joseph Herbert Cope’ hong phuatsak ahi hi. 1910 kumin Tedim khua hong tung a, gamthak nasep kipat nadingin Roman laimalbul (Romanized alphabet — ABC laimal) kibulphuh lai (script) khat hong phuatsak hi.

Lai nam nih a kinei hong suak a, a om masa Laipian lai pen Zotuallai, a om nunung pen Mangtuallai kici hi. Mangtuallai a om-a kipan Zotuallai a kizatna tangtoikik a, a khan ding zah khang nawnlo hi. Mangtuallai ahihleh Cope Topa’ hanciamna tawh khangto semsem a, tuni dongin “Zolai” cih min tawh kizang hi. A kip paisuak nading le a khantoh semsem nadingin nakpi hanciam ding kisam lai bek hi. Tua kawm mahin Zomi van-gil ahi Laipian Lai (Zotuallai) zong kepcing khansuah ding kisam hi.

Zomite le Pilsinna Lai

Cope Topa’ hanciamna tawh malnei lai (script) i neih pen minam khantoh ding kipatna lianpi khat hong suak hi. Sang ah tua malnei lai tawh lai a dang tuamtuam (thulela tuamtuam)  a tangzaizaw-in kisin thei pah hi. Sang-a kisin thulela tuamtuamte “lai” mah i ci a, pilsinna lai ahkl. sanglai pilsinna a gen nuam i hi hi.

1913 kumin Cope Topa in laisinna ah zat dingin ama’ phuatsa Mangtuallai ahkl. Zolai tawh laisimbu khat bawl a, Tedim gam Zomite’ adingin siktawlai tawh kikhen laibu i neih masakpen hi pah hi. Tua banah sanglai simbu tuamtuamm nam tampi, bu tampi hong bawlsak a, ama’ hong nusiat 1938 khit kum tampi sung kizangsuak hi.

Zolai i neih ma-in i gam sung sanglai pilsinna ah Kawllai kizang masa hi. Tua Kawllai pen i pu i pate in theihhak sa mahmah uh hihtuak hi. Lai thupitna a kitheih nailoh hun, sangkah ding nangawn a kingah zawh ma hun, hausate’ thuneihna tawh sangkah dinga kithatang sawl hun hi a,  ut lo pipi-a sang a kah naupangte pen Kawllai tawh a kibikkhak uh ciangin sangkah laisin nuamsa lo semsem uh hihtuak hi.

Ahi zongin Zolai a kineih khit ciangin Cope Topa’ hanciamna mah tawh 1924 kuma kipan sangte ah Zolai tawh laisin kipan hi. Pilsinna lai dingin Zolai a kizat ciangin sangnaupangte in theih-ol sa uhin nuamsa mamah uh a, tua panin sangnaupang tampi khang pah hihtuak hi. Malnei lai (Zolai) nei bek hi lo-in tua lai tawh sanglai i sinkhak pen hamphatna lianpi ahi hi.

Tua hi a, Zomite’ khantoh kipatna pen Khristian lai nasepna hang ahi hi.

Zomite le Gelhlegualh

Cope Topa in lai hong phuatsak i cihna ah a tunga bangin a dawldawlin a om ahi hi. A masa-in malnei lai (script) hong phuatsak hi. A zom ah, tua lai pen sanglai pilsinna (formal education) vanzat khat suaksak hi. Lam khatin ci lehang, pilsinna lai khat hong phuatsak ahi hi. Malnei lai le pilsinna lai a nei i hih pah hi.

Tua nihte khit ah Zolai pen namdang lai picingte mah bangin gelhlegualh (literature) dinmun dong tungtosak hi. 1914 kumin dawng 25 a pha Khristian labu khat bawl a, 1915 kumin Lai Siangtho Mate laibu bawl hi. Zomi gelhlegualh (Zomi literature) a kici thei ding lai a masapente ahi hi. 1919 kuma kipan kha sima kihawm “Thu Kizakna Lai” a kici khat bawl a, a nuntakna a bei 1938 dong zomsuak hi. Zomi gelhlegualh a khangliansak nasep ahi hi.

1932 kumin Lai Siangtho Thak ci-in min a piak, ama’ letkhiat Thuciam Thak a bu-in hong suak hi. Zolai tangthu ah matutna a lianpen khat hi a, Zomi gelhlegualh zong dinmun kip a nei khat hong suak pah hi. 1933 kumin “Vantung Lam Paina” cih laibu khat bawl a, Zomi gelhlehgualh bucing semsemsak hi.

Cope Topa’ hong nusiat khit, tualsung mite in malnei lai hitaleh, pilsinna lai hitaleh, gelhlegualh lai hitaleh ama’ hong patsaksa lai mabante, deihzahin zom zo pak lo uh hi. Ahi zongin damdamin tha la-in hong kipanto uh a, tu hun ciangin Zomite’ lai nasepna pen lungkimhuai dinmun tung nailo ahih sam hangin a malin muh theih ding tampi hong om ta hi. Mailam ah hanciam mahmah lai ding ahi hi.

Mailam Khristian Lai Nasep Maban

A tunga i gensate i et ciangin Zomite’ khantohna thu ah Khristian lai nasepna ii dinmun pen thupi mahmah, lian mahmah ahihna kimu thei hi. Tua ahih manin mailam ah Khristian lai nasepna pen pello-in zopsuak ding, hanciamin sepsuak ding ahi hi. A zomsuak pong ciang hilo-in nakpitak i behlap ding hi lai hi.

Tu hun ciangin Pasian’ na i sepna ah khatveivei lai nasep a kul lua lo danin a gen om thei hi. Upna bulphuh ding hizaw, ahihkeileh kha kimakaihsak ding hizaw, ci thei uh hi. Lai simsimte, kha thu a thuklut lo, a khami lo, cih lamin mu thei uh hi. Upna bulphuhin kha i kimakaihsakna ah lai simna le lai bawlna tawh zong i kop ding a thupi ahi hi.

Lai Siangtho Thuhilhna 12:12 ah, “Ka ta aw, na phawk ding thudang khat omlai hi. Lai gelhin a bu-a bawlna in bei hun nei thei lo a, lai tam sin luatna in pumpi gimsak hi,” ci hi. Hih pen lai gelhgelh loh ding lam, laibu bawlbawl loh ding lam, lai sinsin loh ding lamin a la mi pawlkhat om hi. Zong, a nung a ma enkak kei lehang tua dan ding mah a kisakha thei ding thu ahi hi.

A gamlapi i lehpai kei zongin tg. 9 pan pankik lehang thuhilh siapa’ lai simna le thu kanna kimu thei hi (ESV ah the Preacher ci-in NET ah the Teacher ci hi). Thuhilh siapa pen mipil ahih banah a theih teng mite’ tungah a hilhsawn khat hi a, a tua cih theih nadingin paunak  tampitak kanin sin tangtang, ci hi. Tu hun pau leng, laibu tampitak sim cihna hi. Tg. 12 in a gennoppen a pa in a ta’ tungah a lamlahna le a thapiakna hi a, thuhilh sia nasep cih pen a baih hi lo, lai tampi sim kul, zawh hun man hun cih zong om lo, gimpi tawlpi mahin a kisemsem nam, a ci nuam ahi hi.

Sawltak Paul zong a tunga thuhilh sia nam mah ahihlam a laikhak sungpan kithei thei hi. Khualzinin manlah mahmah taleh a zinzinna a paipaina ah laibu pua kawikawi-in lai sim tangtang hileh kilawm hi. Timothy’ kiangah, “Nong pai ciangin Troas khua Carpus’ kianga ka nusiat ka puantual le laihualte, a diakdiakin savun laidalte, hong keng in,” ci hi (2Tim. 4:13).

Tu ma kum 500 lai-a khang Mangkang mipil Francis Bacon (1561-1626)’ thugen a minthangte lakah khat pen, “Laisimna in thu tawh hong kidimsak a, thugenna in a kigingsa hong suaksakin laigelhna in mi kician hong suaksak hi,” cih ahi hi. Lai a thupitna, lai sim ding a kulna hong lak kampau hi a, tuni dong mah a ciintaak thu ahi hi.

Tua hi a, ei thu-um Khristiante i upna, i nuntakna le i sepkhiatna ah a khanglian i hihtheih nadingin lai tampi sim ni. Sim theih ding lai a om nadingin lai tampi gelh ni. I laigelhte a simtaak ahih nadingin i gelh ma-in lai hoih, lai gina tampi sim masa, sin masa ni. Khanghun khempeuh ah Khristian lai nasepna thupi denden ding ahih man hi.

*****