Sia Mung’ Motto :
The greatest job in the world is to serve the greatest Person—Jesus Christ.
(Leitungah nasep lian pen in a lian pen Jesuh’ na sepna ahi hi.)

Dr. Mung pen i gam ah Laisiangtho pilna lam hong khangtosakpa hi, cileng kikhial lo ding hi. Amah pen Tedim khuapi a, Faith Baptist Bible College le Yangon a Faith Theology Seminar sangpite ii a phuankhiapa le a lutangpipa (Founder & President) ahi hi. Hih sangte ah pawlpi tuamtuam 23 val pan minam 22 bang kikaikhawmin, Pasian nasem ding mi 2000 val bang sang man khin ta hi.

Siapa pen Pu Thawng Khua Tuan le Pi Nuam Ngaih Cing te sung panin April 21, 1955 (Tedim) ah piang hi. Kum 17 a phak lai-in tui kiphum hi. Ahi hangin ka piangthak nai kei, ci hi. A mai kum ciangin 1970 kiim khanlawhna sungah kitelcianna a ngah hi. Hih khanlawhna hangin Tuiphum pawlpi pan EBC a kiphuat ciangin EBC lamah na pawm hi. 1977 kumin Mandalay University pan Chemistry tawh BSc ngah hi.

A pianthak a kipan kuama guaih lohin gospel pai-in Gupkhiatna thu genin vak kawikawi, zin kawikawi hi. 1979 ciangin EBC pawlpi in sia dingin cial hi. Pasianna sepzawh a sawt pian ciangin Laisiangtho sin beh ding kisam ahih lam kiphawkin, sangkah ding ngimna tawh Vaigam (India) lam va zuan hi. Amasa lamin lem thei het lo hi mah leh, anung lam ciangin amau upmawhna sangin a hoih zawin Pasian in gelsak (Eph 3:20) hi. US gam San Francisco ah sangkah thei dingin lampi kihong hi.

San Francisco a sangte in a sang hangin, US koi ci tung ding cih le sangsum koi ci piak ding cih dotna tawh buai-in a om hi. Tua hun lai-in Kawlgam Susialis kumpi in kumpi nasem le Tongzum a semte lo buang gam dang pai ding a kham mahmah laitak ahih manin, laibu passport ngah na ding lampi om lo hi. Vaigam lut simin a hanciam hangin lem pak loin, meltheihte in ciah kik mai in ci uh hi. Ahi zongin, thu mah ngenin hanciamin kum khat le a lang sung bang Vaigam ah a taang hi. Vaigam a om sungin sum nei loin ni 3 ni 4 bang an zong ngawl zelzel hi. Ci zong na thei zelin, hi mah leh, Pasian in damna a pia kik zel hi. Hih hun sungin Pasian in thu tampi tak hong hilh hi, ci-in gen hi. A tawpna ah San Francisco Baptist Seminary ah 1981 pan 1985 ciang M.Div va kah thei hi.
1986 kumin Vaigam mah tawnin Kawlgam ciah kik hi. US pan laibu bu 7000 val bang ciah pihin gamgi ah sakal tawh pua-in Tedim tun’ hi. Hihte pen sang a hong ciang ading a, a kisam penpen van manpha ahi hi. Tua kum mahin a zi Nu Niang Ngaih Ciin tawh kiteeng pah hi. Pasian in thupha pia-in tapa 3 le tanu 1 nei uh hi.

1986, September kha ni 1 ni-in Faith Baptist Bible College sang Tedim ah a kipan hi. A kipatin sangnaupang 77 le sia 4 tawh hi. 1993 kum ciangin Master of Arts (Theology) kum 2- zaan program kipan hi. Faith Baptist Theological Seminar zong 2003 kumin Yangon ah kipan hi. Master of Divinity (M.Div) program hi.

May 12, 2000 kum in America gam Pennsylvania State, Clarks Summit Khua a om Baptist Bible College and Seminary panin Doctor of Divinity D.D (Honorary) kipia hi. Tulaitak Global Zomi Alliance (GZA) ah General Secretary sem kawm in Pasian’ na a sep laitak July kha, 2021 kumin ana a sepsak Pa Pasian’ Ang a ciah ta hi.

Dr. Do Suan Mung’laibu gelhte:
(1) Tapidaw pawlpi leh Upna tangthu – 2005
(2) Puak Kawikawi theih Laisiangtho sang – 2011
(3) Tapidaw pawlpi leh upna tangthu (Kawllai) tawh 2014
(4) Sia Do Suan Mung – Thuhilhna Volume One 2014
(5) Sia Do Suan Mung – Thuhilhna Volume Two 2018
(6) Sia Do Suan Mung – Thuhilhna Volume Three 2020

(“Meet the Founder: Dr. Do Suan Mung’ cih https://liveglobal.org a suak thului ki-etkak hi.) 