Minam khempeuh nungzui suahsak ding pen Jesuh hong sawlna ahih leh, a nungzui suak dinga (Khazih nungzui dinga pattahna) a kipantah nai lo minam (ahih keileh) phaknailoh minamte i zonkhiat ding a kisap masak lam i theihsa hi pah hi. Sawlna lianpi i man ding leh, hih a kipha nailo mite koi ah om hiam, cih i theih ding kisam hi. Tua hi leh nasepna ah a buai lo, cih bek hi lo-in gahpha i gah ding hi.

A kipha nai lo mi a tamzaw leitung mun kiu khat ahi “10/40 Leitang(10/40Window)”a kicihna-ah om uh hi. “10/40 Leitang” cih ciangin Africa nitumnalam gam lam pan Asia nisuahnalam gam sunga om degree latitude 10 pan 40 kikal munte a genna hi. Tuhun in leitung ah a kipha nai lo mi 2.9 billion lak ah 97% pen 10/40 Leitang sungah teng uh hi. 1% sangin a tawmzaw a kipha nailo mite North leh South America ah teng uh hi.

10/40 Leitang pen a kipha nailote mite tenna mun a kiciapteh theih nading a, a kizang kammal ahi hi. A kipha nai lo (Gupnathu za nailo) mite i gen tak ciangin a tenna uh mun le mual hi lo zaw a, gupnathu a zak theih nading uh lampi a om ngiat lohna a gen nuam ihi zaw hi.
A kipha nailo mite pen Khazih a thei nailo na veng na pam, na innkuanpihte sangin a “mangthang zaw” cihna hi lo hi. Ahih hangin, kipha nai lo cih ciangin lungdamna thu (gospel) zak nading hunpha a ngah khalote hi zaw hi.

A BUAIHUAI PEN MANTHANNA (LOSTNESS) HI LO – IN LUNGDAMNATHU (GOSPEL) ZAK NADING LAMPI A OMLOHNA HI ZAW HI.

Tua bangin na nuntak sungin gammial nasem kuamah hong pai lo hi ding. Tuipi ah tui a tam bangin leitungmi million tampite lak ah mi khat na hi hi. Lungdamnathu (gospel) za kha ngei lo, hong kigenpih kha ngei lo-in na nuntakna a bei dingin kingaih sun in.

Hih bang munte pen a kiphaklohna a hang pawlkhat om hi. Amasa penin hih mite Pasian’ thu, khalam thu kizak theihna mun ah om kha lo uh hi. Leitung biaknapite, dawi le kau biaknate hih bang mun panin hong kipan a, kiptakin lenkip uh hi. 10/40 Leitang sungah Muslim 1.3 billion, Hindu 860 million, Buddhists 275 million bang om hi. Tua tawh kizawitawn in gam tampite lungdamnathu (gospel) gen ding a kikhamna mun zong hi lai hi. Ahi zongin Jesuh in hih bangin na gen hi, “An lak ding tam, a la ding mi tawm”. Hih bang munte ah lungdamnathu a kigenlohna a hang bulpi pen in a kuankhia nuam thu-ummi a omloh man ahi hi.

Tuhun in, gamdangmi gammial kuante (missionaries) lakah 10% cih ciang bek a kipha nailo munte ah kuan in, a dang 90% te ahih leh a kiphasa mun, ahih hangin lungdamnathu a kigen nailohna (unevangelized) munte ah kuan uh hi ci-in kiciamteh hi. The World Christian Encyclopedia tungtawnin, US a “Gammial nasepna (mission)” ading a kipia sum khempeuh lak pan dollar peek khat pan piia 2 ta bek a kipha nailo munte ah kizang hi. Tua loteng pen a kiphasa munte ah lungdamnathu gen suak theih (evangelize) nadingin kizang hi.

Martin Luther King Jr. in hih bangin gen hi, “Thei gega a, awlmawh lohna sangin a lauhuai zaw om lo hi,” ci hi. Pasian’ gam keekna ah i nasep dan maan takin hong gen ka sa hi. Hih thute sin toto-in i nasepnate minam khempeuh nungzui suahsak ding Pasian hong sawlna tawh kizui-in kipuah huai mahmah hi. Tu laitakin lungdamnathu a za nailote’ kiangah kuankhiat ding i kisatsuah laitakin, lungdamnathu a kigen khitna munte hangin Pasian’ min i phat ding zong thupi hi. A taktakin, hih pen a kihtakhuai nasep khat hi mawk hi. Ahi zongin pawlpi tungah Pasian hong sawlna ahih manin Pasian tawh a piang theilo na khat beek om lo hi.

Ngaihsun khawm ni.

1 JOHN 4:35 & MATTHEW 9:37 – 38 (Luke 10:2 zong etkak in)
Pasian in leitungmite Ama kiang a zuan dingin bangci muh hiam?
2 JOHN 3:16 – 18, 2 THESSALONIANS 1:6 – 10, ROMANS 6:23, & JOHN 14:6
Hih Laisiangtho munte in Jesuh kiang zuan lo pi-in nuntakna le sihna ah mihingte hihna maan bangci bangin hong gen hiam? Amaute dinmun bangci ngaihsut na hiam?
3 HABAKKUK 2:14 & MATTHEW 24:14
A tunga a kipha nailo mite a nambat tawh lahna tawh kizui-in, hih laisiangtho munte in bang lametna hong pia hiam?

NUNTAKPIHZIA DING
1 A kipha nailo munte a lim gen deuh website – te en in, gtn. Joshuaproject.net, operationworld.org, peoplegroups.org, leh prayercast.com.

2 Nisim na nuntakna ah pongmaanin a kipha nailote ading thungetna kipan in. An neek ma, lup ma, ahih keileh zingsang 10:40 cih bangin hun khenin thungen in. 

Sian Nuam