Muslimte in zong Jesuh um uh hi. Amau laisiangtho Quran le Hadith bute sungah Jesuh le a nungzuite’ thu, tuiphumpa Johan, Mary le Lai Siangtho Lui sunga kamsangte thu tampi kihel hi. Leitung bei ding le Jesuh hong pai kik ding zong thei uh hi. Antikhazih a om ding zong gen uh hi. Tua manin Khristian tampi in hih biakna nih pen a kilamdangna thei lo uh ahih manin a kibang sa kha uh hi. Muslimte in zong a kibang hihang, cih tawh Khristiante zolin US bangah 9/11 khit zawh Muslim a suak a zah li khang hi. Ei thu-um mite in i upna i theihcian (telcian) kei leh, hun nunung ah koi zaw a maan zaw hiam cih khentel theihloh zah dong dingin a maan pianpian le maan dedek zuauthu le mizuau tampi hong pai ciangin khem i tuak kha ding hi.

Quran sunga Jesuh

Jesuh tawh kisai Muslim Laisainghto Quran (Koran) sungah Surah (A Lian) 15 sungah a neu tang 90 val ah Jesuh thu na gen hi. Jesuh pen Muslim hi (sura 5:111). Jesuh bek hi lo, Abraham, Moses, Noah-te zong Muslim hi ci hi.  Jesuh pen nungak siangtho Mary sung pan suak hi, mawhna nei lo hi, kamsang dangte sangin lian zaw hi, cihte kigelh hi. Ahi zongin a tamzaw ah Jesuh ii Pasian hihna, singlamteh tungah a sihna le a tawhkiknate nialna vive kigelh hi.

Quran sungah Jesuh pen si loin, Allah in ama kiangah la toin, Thawhkik Ni (Second Coming) ciangin hong pai kik ding hi, ci hi (sura 19:33, 3:55). Sura 4:157 ah zong, Jesuh si loin, kithat loin Pasian (Allah) in ama kiang lato hi, ci -in kician takin gen hi. Surah 4:171 Thum gawm Pasian (Trinity) cih bang om lo hi, Jesuh pen Pasian sawltak khat bek hi lel hi, Pasian khat bek om hi, ci-in Jesuh ii Pasian hihna, Thum gawm Pasian khat hihna na nial hi.  Sura 3:45 le a dang mun 20 val ah “Jesuh pen Mary’ tapa” bek na ci-in, Pasian’ tapa ahihna a nial hi.

Tua manin in Muslimte in Jesuh pen ko zong um ung, amah kamsang khat hi, a cih uh hangin Jesuh pen Pasian’ tapa ahihna, Amahmah Pasian ahihna, Jesuh in eite tang dingin hong sihna le a thawhkiknate, cihna nial uh hi.

Ka laisim ngei khat, Hazrat Mirza Ghulam Ahmad at, “Jesus in India (2004)” sungah Jesuh pen India, Kashmir ah a mangthang kumpi Saul’ suanlekhakte a zongin pai hi, ci hi. Tuate pan tulaitak Talibante a panpih mahmah Pathan (Pashtun) mualtung minamte ahi hi. Tibet ah Dalai Lama kiangah zong hawh hi, ci-in Russian tangthukante in Lhasa a buddhist laite sungah mu uh hi, ci hi. Hih tawh a kibang pian mah, “Jesus in Kashmir: The Lost Tomb” cih laibu zong Americante  Suzanne Olsson 2011 in  khawmkhia hi.

Hadith-te sunga Jesuh

Muhammad nungtak lai-a amah tawh kithuah kha a nungzuite ii thugente pen kiciamtehin tua pen Hadith  kici hi, Quran zahin thuneihna a neih loh hangin, Quran sung pan a tel lohte uh hih Hadith-te tawh etkakin Quran sunga om lote zong hih Hadith sung pan a lak uh ahih manin Quran zah phialin a thupi sim uh ahi hi. Hadith bu tampi a om hangin, Sunni-te in bu 6 bek a thunei deuh, amaan deuhin sang uh hi.

Hadith Dawud bu sungah, Jesuh pen a tun a laihawl pawl,  a ci a sa sanin, a sam kilin, a awm zai hi. Puantual naipak nih silh ding hi (Dawud 37.4310), na ci hi.  A bu dangte ah “Amah in mite a dingin Allah tungah thumsak thei lo a, Muhammad bek in thumsak thei hi. Jesuh in Allah bia hi. Jesuh a suak phet, luai sungah a om lai pekin pau thei ta hi, cihte kihel hi.

Hadith laibu Sahih Bukhari sungah Jesuh hong pai kik ding lam, Muhammad in a genna kiciamteh hi.  Jesuh pen a thumaan taka thukhen dingin hong pai kikin Allah a um lote, vokte, Jewte, Khristiante le biakna siah apia, Muslim a hilote that mang ding hi (Bukhari 4.657), ci hi.  Amah pen Muslimte ii makai lian pen ding ahi Imam Mahdi tawh hong pai khawm ding hi. Leitung ah Muslim Gam (Islamic State) maan taktak a phut dingin Madhi hong pai ding cih pen Muslimte lamet pipen ahi hi. Tua manin Isis makaipa peuhpeuh in Imam Madhi hing ci-a tangko-in Syria ah phaulsat ding a hanciam mahmah uh ahi hi.  Jesuh pen tua Madhi huh dingin hong pai ding ahi hi. Jesuh in tu ma kum 2000 lai-in singlamteh tungah note adingin si lo hi ing. Kei zong note bangin mihing khat mah ka hi lel hi. Pasian hi lo hing, ci ding hi. Singlamteh kuaitan ding hi. Madhi hong pai ciangin a kilat masak nading pen Syria gam hi dingin ki-um hi. Tua manin Jesuh zong Jerusalem ah hi loin  Syria gam Damascus khuapi nisuahna lam pan hong kilangh dingin kilamen hi. Hih pen Muslimte ii Second Coming ahi hi. Jesuh le Mahdi in kum 40 sung thumaan takin ukin Antikhazih, Arabic kamin Al-Dajjal zong that ding hi, ci hi.

Jesuh le Madhi in Syria pan kipanin Allah a um lo, Jew le Khristiante simin, Jerusalem la ding hi. Jewte minam bei dingin sim ding hi. Tu lai Gaza lungphona a neite ii slogan ahi “From the river to the sea” a cih a tangtungsak ding pen Jesuh le Madhi dingin Muslimte in a lamen mahmah uh hi-in, amau mahmah in biakna gal Jihad piangsakin sim ding that ding a hanciam den uh ahi hi.

Jewte a thatzia ding pen Hadith bu khat sungah hih bangin gen hi. “O Abdullah, O Abdul Rahman, O Muslim, hong pai in, ka nungah Jewte khat bu hi, that in” ci-in singte suangte kiko liang ding hi (Muslim 41.6985), ci-in Hadith Muslim bu sungah gen hi. Muslimte in Jewte amuhdah a thatnop uh pen thudang hi loin, a biakna ii sawl, tavuan khat ahi hi.

Khirstiante’ upna tawh i etkak ciangin, Muslim Jesuh (Isa) le Khristian Jesuh pen a kibang tawh a kibat hangin kibang deksuai lo hi. Hun nunung tawh kisai upnate ah zong ei upna tawh Islamte’ upna kilehbulh kilkel hi. (Hun Nunung Special Thuluite na sim kik in.) Madhi a cih pen Anti-Khazih tawh kibangin, Muslim Jesuh a cih uh pen Maangmuhna sunga kamsangzuaupa tawh kibang hi. Antikhazih le kamsangzuaupa te hong kilat ciangin kamsangzuaupa in Jewte le Khristiante zol dinga hun khat ciangin a um lo khempeuh that in Jerusalem buluh ding uh hi.

Thukhupna

Kamsang Muhammad hunin Arabia ah Jew le Khristian tampi om khin ahih manin, a Quran at pen zong Judaism le Khristian biaknate’ huzap zong a tawm a tamin kihel hamtang dingin mipil tampi in um uh hi. Khristian Laisiangtho sunga thute a sang a um danin Quran sungah gen napi in, hon khat laihin ama gen a maan pen suaksak hi. Gentehna-in, Abraham in Moriah mual tungah biakpiakna dingin a piak a tapa pen Isaac hi loin, a ta upen Ismael hi, ci hi. Minam vai a deihkaih gawp hi leh kilawm hi. A tungah i gen mah bangin Jesuh pen sang napi, a hihna taktak teng nial se hi. Hih pen Pasiang langpang, Jesuh langpang Antikhazih kha tawh kiphuan biakna, antikhaziah kha tawh ki-at Quran laibu ahi hi. Hun nunungah zong kua in Antikhazih lian hi ding  cih i theih loh hangin, a nungzui dinga kigingsa antikhazih kha tawh kidim Muslim mipi million 1800 om sitset khin cih phawk ni.

Etkak laibute:

1. Islamic Antichrist by Joel Richardson
2. End times eyewitnesses (Documentary Movie) directed by Joel Richardson
3. The truth about Islam and Jesus by John Ankerberg
4. The Islamic Jesus by Daniel Deleanu