Lai-at: Nu Zonu

I thulu om mah bang in, ei Pasian thu um khristian kici tampi tak in ngeina bangin i zat den ahi, i nisim kampaute Pasian deihna tawh kituak mah hiam ngaihsun kikin, Laisiangtho tawh tawm etkak ni. I kampau natawh mi kithat/thanemsak thei a, ei mahmah zong tua i lungsim in ong puksak thei hi. Rom 3:13 A kam uh tawh mi that uh a, a kam uh tawh zuauthu gen uh a, a kampaute uh gulgu tawh kibang hi. Mite in ei hong muh ciang in, Jesuh lim le mel amuh theih nading un, limpha ahi dingte ihi hi. Rom 15:2 Midangte a upna uh hong khangin, mihoih hong suahtheih nadingun i gamta ciat ding hi.

I phawkkhak loh, i zattang zang theih, amaan/adik lo, i kampau theih pawl khat ensuk ni. A tamzaw pulpit tung ding munte i  Sia/Siamahte le Worship makaite bangin, a zat theih uh kammal in;

(1)Mi tampi tak, khut le khe nei loin om hi. Pasian in nang khut le khe ong pia, na khut bengin na khe tawh diang in.

(2)Mi tampi tak, zato inn ah omin, thonginn sungah om hi. Pasian in nag tua mun tawh ong kipelhsak a, Biakinn ong tungsak lungdam ko in.

(3)Mi tampi tak, oxygen tawh nak uh hi, nang tua kul lo napi-in Pasian phat in, cih bang kammalte ki zang mahmah hi. Limtak ngaihsun kik leng, hi munah tua mi i cih kuate hi se hiam? En mi i cihte, Pasian in mi a na ci mah diam? Ei i lungdamna tawh, Pasian i phat ding hi lel a, i kiim i pam a te va kawk kul sese lo hi. Khut le khe nei lote e leh, a mawhna hang uh hiam? Zato lumte, thong inn paite e leh,  a mawhna hang vive uh hiam? Zong hi thei mah inteh, aih zong tua amawh pente zong a it Pasian hi. En mi i cih  ciangin, i Pasian phat nuam lua hi napi hang in, i phat Pasian a lung a kim mah diam? A lungsim na nuam hetlo zawin ka um hi.

Luka 18:11 na sung ah Farisi pa ii thunget na en ni. “Pasian aw, kei pen midante bangin ……. hua lai-a siahdong pa bang hi lo ka hih manin”, cise hi. Jesuh in tua thungetna zathei hetlo ahihna mu hihang. Tuapa ii ngah ding thaman 14 na ah ong gencian hi. Ei phatnate zong amah a lung a kim diam? Kisittel in, pilvang takin, kam i pau ding ahi hi. Biakinn bek Pasian phat na’ng hi zenzen lo a, thonginn sung a omte’n, zato inn a omte’n, a omomna vuah Pasian na phat ziahziah ta hen. Khut le khe neilote’n a aw uh tawh Pasian na phat ziahziah uh hen la, khua za lo, pau thei lote’n a khut a khe uh tawh, Pasian na phat ziahziah ta uh hen.

Banghang hiam cih leh, Pasian in leitung mi khempeuh deidan nei loin, it kim hi. Ei Pasian tanu tapa kici napi, i  Pa’ itte it zo loin, i kam tawh deidei keei mawk hihang. Thong inn a omte, zato inn a omte in na za leh, a lungsim uh na mahmah kha ding hi. I kampau nate in mite le Pasian a kimuhna hi zaw tahen. Rom 15:2 ah midang te a upna uh hong khangin, mihoih hong suahtheih nadingun i gamta ciat ding hi, na ci hi. I Pa deihte deih thei-in, a itte it thei-in, i Pa i sut zawh semsem nang, i nisim nuntakna ah kisin toto ni. Matthai 5:48 Tua ahih manin vantungah a om na Pa uh a cingtaak mah bangin note zong lungsim citakin na cingtaak nading uh na hanciam un.

Pasian in deidan nei lo a, leitung mi khempeuh a it kimna LST mun tawm enni. *(Matthai 5:45 Tua hileh vantungah a om na Pa uh tate na hi thei ding uh hi. Bang hang hiam cih leh amah in mihoihte le misiate tungah a kibangin ni taangsak khawm a, a gamtat phate le a gamtat siate tungah zong a kibang mahin guah zusak khawm hi.).     *(Johan 3:16 Pasian in leitung mite hong it mahmah ahih manin ama Tapa a um mi khempeuh si nawn loin a hin tawntung theih nadingun a Tapa neihsun a hong piak dongin a hong itna a hong lak hi. ) *(1 Johan  2:2 Tua Jesuh hangin eite’ mawhna hong kimaisak a, eite ading bek hi loin leitung mi khempeuh’ mawhna zong a mai nading ahi hi.)

Ei mahmah ong thanem sak i kampau/ ngaihsutna hoih lo pawlkhat.

Innthak/mawtaw thak lungdam kohna khawng i neih teh, mite ading bangmah ahih se loh hang, kici kha sese hi. Hi munah kua mi hi zel hiam, i kiteh pihpih? Pasian in ei ading, a hoihpen ong piak hi a, i kiim i pam kawk kul lo a, lungdam koh ziau ding hi napi, ko innkuan phadeuh mi bang loin mite bang a hi zo loin, i cih sete kua mi hiam na etet. Ei pen ei ding a Pasian in ong bawl hi a, mi tawh kiteh se loin, i hibang a lungkim thei leng, i Pa Pasian zong a na lungdam mahmah ding na hi zaw hi. ( Galati 6:4).

LST sungah mi tawh kitehkat teh a lungkia/ lungsim bei 2 le 3 en ni. 1kumpi 19:4b ah Elijah nakpi in lungkia in, a sih nang thu ong ngen hi. Ka Pate sang ka hoih zaw kei hi, ci pongmawk hi. Mi tawh ong kiteh ciang lungkiatna, sihnopna lungsim na ngawn ong nei hi. Mi tawh na kiteh se kei hen la, Pasian sepsak sateng tung Lungdam ko leh, a lungdam koh ding bei lo ding hi. Luka15:11-31 ah Tapa taimang ii a upa in a naupa a ciah ciang, a pa nuam lua-in pawi ong khamsak a, amah na heh mahmah pongmawk hi. A Pa tawh omkhawm a, a Pa neihsa teng ama a’ hi napi, a naupa ong haza mikmek pongmawk ciangin, amah le amah ong kisinsonsak tawm hi. 1 Samuel 18:6-9 ah Bang hangin Saul in David haza hiam? Lawmte bangmah phawk lo, numei pawlkhat in na kidemsak pongmawk uh hi. Saul in a tulin that, David in a tul 10 in that, a na cih uh ciang Saul heh mahmahin, David ong encik hi.

I gennopna bulpi in, Pasian in ei pen ei ding a ong bawl hi napi, i kiim i pam tawh i kitehteh a, i kidemdem ciang, hazatna, hehna, lungkiatna, etc. tampi tak ong om to-in, ong bawl Pasian tung zong kilungkim zo nawnlo mawk hi. Tua pen ei le ei kibawl i hi lel hi. I ngaihsut, i gamtat, i mithek in eimah ong awksaksak na hi hi. I hi banga, hong it Pasian tungah, i hi bang tawh lungkimin, lungdam kohkoh ding ahi hi. Leitung mite/nate tungah kidem hi lo zawin, i Pa sutna lamah kidemin a khangcing toto dingin, kei a kipan akua mapeuh kideih zot hang. Efesa 4:13 Tua hileh Pasian’ Tapa i theihna le i thu upna-ah kithukhatin, eite a khangcing suakin, Khrih’ cingtaakna ciang i banto ding hi.