Numei le Fashion icih ciang, adiakdiakin numeite pen kihoih nuam, kipuah nuam, kizem nuam phadeuhte hihang. Numeite a sih dongmahin, niklepuan deih hi,  a kici mahbangin silhleteen pen numeite adingin thupi mahmah hi. Kizeemin kipuah theileng, tampi tak hong etlawmsak mahmah a, ahizongin amun le  amual tawh kizui-in kizep theih ding zong, hong thupi mahmah ding hi.

Gentehna: Biakinn ah silh ding akilawm puan om a, mopawi ah silh ding  akilawm puan om hi. Night Club paite’ silh puan zong na om hi. Amun tawh  kituak a silh leng etlawm mahmah dinga, vaang zong kinei ding hi. Hih bang  igen ciangin, silhleteen bekbek thupisak ding cih zong hong hi tuanlo hi. Sum  ngah zahzah, niklepuan, silhleteen na lei pahpah leh sum na hau thei kei ding  hi. Ahizongin na hauh ding khat bel om, tua pen niklepuan, le silhleteen  bekmah hong hi ding hi.

Puanlam Fashion: Puanlam Fashion pen niklepuan bek hi lo, gamtat, kampau  tawh kizom hi. Mikhat pen a kipuah dan tawh kizui-in, alungsim tampitak kimu (kisim) thei hi. Tua ahih manin piangthak, thu-um mikhat ihihna tawh kituakin i gamtat ding hong kul hi. Zeisu Gumpa le Topa a, sangkhin talel ci-in, ut  dandan a, silhin, gamta ding hi tuanlo hi. Gamtatna in vangam hong tunpih loh  hang, Pasian’ mai le mite’ mai-ah a kilawm a kituak a, nuntak kul hi.

James. 2:14 sungah, “Upna ka nei hi,” a cih hangin a sepna in a zuih kei leh bang  phattuamna om ding ahi hiam? acih mahbang in, upna le gamtatna pen a kimu  thei pualam Fashion ahi, silhleteen, gamtatna, kampauna tawh kilang khiasak  in.

Sunglam Fashion: Sunglam Fashion zong thupi mahmah a, tua in sunglam  lungsim cihna hi. Mihingte in a kimu thei pualam kizepna thupisa uh a, Pasian  in ahih leh a kimu theilo sunglam lungsim thupi sa hi. Pasian’ deih lungsim  banghiam cih tel kul hi. Pasian’ deih lungsim icih in, lungsim takpi tawh um  ding. i upna pen gamtatna pha tawh lakkhia ding. Kam bek tawh hilo, lungsim  takpi tawh a um, a zahtak mi khempeuh pen Topa in, vantung thupha leitungah  hong sangsak hamtang ding hi. Pualam fashion le sunglam fashion kituaksak  ni.

Hih lai a simkha mimal kimtungah Topa’n thupha hongpia tahen.

Laigelh:

Sm. Zam Nuam Lian @ Tomno