2023 Pa’ Ni a mu theilai dingin hamphatna ngah kik i hih manin Topa tungah lungdam i koko hi. Facebook pan ka sim khak khat Pa tawh kisai, “I nute in a gil sungah kha kua sung hong pua in, i Pate in a tawntungin a lungsim sunguh ah hong pua uh hi,” kici hi. Hih thu maan ka sa mahmah hi. Pa hoih ahi a, a hoih khollo ahi zongin a tate uh a lungsimah om tawntung veve hi. Zu khamkham papi khat in a makpa dingin zu khamkham khat deih tuanlo hi. Leitung mite in Pa Pasian in hong it’na i tel zawhna dingin leitung pa hong pia hi ci-in ka um hi.

Pa pawlkhat ahih leh zi le tate kihtak mahmah dingin om uh hi. Tate a thu hilh uh ciangin sat ding bekin ngaihsun uh hi. Pawlpi kem sia pawlkhat le upa pawlkhat bang a tate uh bek hi lo, a zite uh zong ganhing danin bawl thei uh hi. Zomite’n zima khollo kici ahih manin a tenpih bang om uh a, amau ngaihsut na bang loin vuak khawng thuak thei uh hi. Pa pawlkhat in a zite uh, ta tampi neisakin, keppih khollo uh hi. Meltheih inn khawngah koih kawikawi uh hi. Nu le pa in mehlim khawng tuam nekin tate a pia lo zong om mawk uh hi. Kumpi nasem pawlkhat bang a khutnuaite a uk bangin a tate uk mawk uh hi. Lamlak a, a kisia naupangte pen innsung nuamsa lote hi, mun ngah zolote, naulai pawlte hi zaw uh hi. US bangah nu le pa in nasem ahih manun tate don man nawnlo uh hi. A tate an hoihtak pia lo a palikte mat zong om mawk hi. Nupa kitawng dente inn sungah a tate mah hehpih huai pen hi. Zomi pawlkhat a dingin US tun pen nupa kikhenna mun, le tate siatna mun ding a kizuan tawh kibang mawk hi. Pawlkhatte’n TV, iPad, iPhone, a deihte uh leisak uha, a kicing khin sa uh hi.

Pa pawlkhat in guihtheih khamtheih zang uh hi. Game bekbek a kimawl zong om hi. Casino tawh a neihsateng a beisak zong om hi. Nulepate in nasep nei tuak uha, a nasepna  mun tuak uhah a kitam thuahpih khawngte uh tawh a kiteng kik zong, om mawk uh hi. Kumpi huhna sum a deih manun nu pa kikhen zong om hi. US i tun pen thupha hi het lo hi. Malay khawngah a om lai un; innkuan an ne khawm, thungen khawm, sum zong khawm, Pasian bia khawm uh hi. Gam thumna a tun uh ciangin tua a biakna taute uh beimang ta hi. Inn lam sum khak inzong, nupa’ kal buaisak tawntung hi. Sum tuam, bank tuam neih na, tax return hunah buaina tam mahmah hi. Nu pa kikhen nuam a, zumkong mangkong a kitun zong om mawk hi. Naupang i tate kisap masak pen: Sum hi lo hi, nu le pa’ itna, donlekep, hun piaknate ahi hi.

Rev. Dr Job Thawngno in, “Zomi pasalte sum nei le uh, zi behlap nuam uh a, Numeite ahih leh sum nei leh pasal kisam sa nawnlo hi. Zi beh laplapte innkuan sungah a tate hehpihhuai ka sa mahmah hi. Pasian in Adam zong zi khat bekmah na guan ahih ciang khat bek mah tawh a lungkim thei dingin Topa in hong siam tek tahen. Nu le pate a kidop huai mahmah thu khat om lai hi. Nu le pa pawlkhat in inn sungah hamsiatna kam bekbek zang thei uh hi. I tate bang ci-in daupai thei mah ding ahi hiam? I kampaute a ciamteh gige khat na om mawk hi. Thu dangkhat leuleu ah tate, numei pasal deidanna, numeite pen mi a ding hi ci a, pilna zong hoihtak sinsak lo cihte, om thei mahmah hi. Tanupil i nei leh makpil nei ding hi zaw hi. It lua liang a, thu hilhlohna zong a hoih pen hi lo leuleu hi.

PA HOIH NIH

Tu kum Pa’Ni a dingin mi nih kong tel hi.

1. JOB (Job 1:1-5)

Lai Siangtho sungah etteh tak ka sak mahmah khat ahi hi.

(, Job’ nisim mawh’sutna Google)

Job kua ahi hiam?

1. Sum le ganhing hau mahmah khat hi in, Uz gamah a teng ngei khat hi. Innkuan tam mahmah le a picing’pa khat ahi hi. Uz gam i cih pen; Edom gam khanglam le Arabia gam nitumna lamah om hi. Job pen Jacob’ tapa; Issachar i tapa thumna hi, (Dake Bible, 852). Tanu melhoih mahmah thum le tapa sagih nei hi. Pasian a zahtak, pau baanglo, a thutang, gamtat hoihlo peuhmah a pel mi kici hi. Ama hauhna; nisuahna lam ah a hau penin kigen hi. Ama hauhna in Pasian mangngilh sak loin Pasian zahtak zawsem sak hi. Hih Job Lai Siangtho bu pen; Lai Siangtho bu 66 sungah a ki kaikhawm, a ki-at masa pen ci-in laisiamte’n ciamteh uh hi.

1. A Nuntakzia: Job pen tangthu mawkmawk khat hi loin, leitungah a om taktak a hihna kamsang: Ezekiel le James in na pulak kik hi, (Eze.14:14, 20; James 5;11).  Nisim in a tate a dingin biakpiakna bawlsak hi. A tate in nisim in inn khat khit khat ah pawi bawlin a sanggam numeite uh zong sam uh hi. Job in a tate a banbanin pawi a bawlkhit uh ciangin, samin a vekun siansuah den hi. A tate a phazah tawh kizui-in meihal baikna a pia tawntung hi. A tate Pasian tungah a khialhkhak ding patau mahmah hi.

1. Natna a ngahna thu: Pasian um, muamg mahmah ahih manin Satan in zong haza zo phial hi. Pasian tungah Satan in Job a khialh theihna ding thu vaihawm den hi. A zi in zong kamsia tawh mawhsak den hi. Ahih hangin Job, Pasian tung khial lo hi. A lawmte thum zong natveh ding hong pai uha, ahih hang natvehna kampau lo uhin, mawhsakna kampau zaw uh hi. Ama natna pen laisiamte in phaak natna hi dingin um mawh uh hi. A neihsa khempeuh le a tate beisiang hi mah ta leh Pasian phunsan hetlo hi. Topa in Job tungah tanu tapa neihsa tampitak pia kik zaw hi. Job in, “Ni dangin mi’ gensawn bekin nang ka hong thei a, tu-in keima mit mahmah tawh nang ka hong mu ta hi,” ci hi, (42:5).

1. Job’ gen pilna (Wisdom) thu: Pilna sinna sang pan le a tuamtuam sin theihna pan i ngah pilna pen Mangte’n (Knowledge) na ci hi. Ahih hangin Pasian piak pilna pen sin theih hi lo hi. Leitung mipilte in pilna (Wisdom) koi pan kingah (or) koicih ngah ding cih thei zo lo uh hi. Tua thu a thei nuamte in Lai Siangtho a sim uh kul mawk hi. Tua thu tawh kisai Job in na tel gen mahmah hi. Job 28:1-28:

• Mite in pilna pen leisungah om ding sa uha, leisung to uh hi. suangmanpha mu thei uh hi. Ahih hangin leisungah pilna (wisdom) na om lo hi, (28:1-6).
• Pilna (wisdom) van a sang penah om kha ding hi, ci-in Simbung le Luaimu kiangah a va zon uh leh amaute in, “Ko tua lampi ah pai ngei kei ung; ko kiangah om lo hi, “na ci kik uh hi, (28:7).
• Ganhing lakah a tha hat pen Humpinelkai kiang le ganhing dangte kiangah, “No tha hat mahmah in, mite kihtak mahmah na hih manun no tua pilna (Wisdom) omna, na thei kha uh hiam?” ci-in a dot uh leh, “Ko tua lampi paim kha ngeilo,” na ci kik uh hi, (28:8).
• A thuk mahmah Tuipite kiangah, “No tha hat mahmah, thukin zai mahmah na hih manun no sungah pilna (wisdom) a om mah hiam?” ci-in dong leuleu uh hi, (28:14). Amaute in,” Ko sungah, ko kiangah zong om kei,” ci-in na dawng kik uh hi.
• A tawpna ah a lau pen uh le a thahat pen: Sihna le Hell kiangah va dong mai ni e, ci-in khensat uh hi, (28:22). Sihna le Hell in, ‘thei lo’ a cih dinguh ut lo ahih man-un; “Ko a thu hemzak bek ung e,” ci-in na dawng kik uh hi.

Mihingte’ thahatna tawh suangtum a kipan mualbul dong to zo uh hi. Amau thahatna tawh Tuipi sungtawng dong lutsuk zo uh hi. Leitung sumpiang, suangmanpha a hi, Ofir, Suangkhi, Limlang, Kep, Topazte to zo, zong zo uh hi. Ahih hangin a thahatna uh tawh pilna (wisdom) ngah zo tuanlo uh hi. Job in leitung mihau, mipil, mi thahat, kumpi, Sihna le Hell te’n a theih zawhloh pilna (wisdom) pen: “Pasian bek in pilna (wisdom) lampi thei a, amah bek in a omna mun a thei hi, a mah in leimong dong mu a, vantung nuai-ah a omna khempeuh a mu thei hi. Pasian in huih a gik ding zah bawlin, tuipi a liatna ding zah a seh laitak, guah a zukna ding thu pia-in, khuaphialep in a zuih ding lampi bawlin a vaihawm laitak nangawnin, amah in pilna mu-in a manphate entel a, amah in hoihsa ahih manin a kip sak hi,” (28:20-27).

1. Pilna (wisdom) bulpi, koi ci ngah ding?

“Topa zahtakna, pilna hi a, siatna pelhna pen thutheihna hi,” na ci hi, (28:28).

1. Pa KHUP (Tulsa)

Zomi sungah tu kum Pa’Ni ah thupi ka sak Pa Khup kong telkhia hi. A ma tungah zong phalna ngen lo, heh lo dingin zong ka lam-en hi. US gam sung innkuan tawh kisai tentan ka piakna tampite ah amau innkuan thu ka lim gen ngei mahmah a, tam veipi zong za khin uh hi. Pa Khup in a tate lawmbawl mahmah in, ko kiangah (Columbus) a omlai uh in, a tapa kiangah, “Nang ka pa hi lecin, bang hong ci bawl ding na hiam?” ci ngei hi.

Hih a zat kammal pen hoihsa lua ka hih manin, tu kum Pa Khup pen Zomite theih dingin kong pulak hi. Pa Khup In:

-A tate thupisa hi

-A hun pia hi

-Lawmbawl hi

-Amau lungsim thei nuam hi

-Lawmta bangin kikholhpih hi

-A tapa lunggulh teng vaihawmsak pah hi

– A tapa in zong ta a neih ciangin tua dan na zang kik pah ding hi.

Pa Khup in a tapa tungah a tuh khaici: Ama khan sung a dam sungin a gah at kik ding hi, ci-in ka um hi. A tuh khaici pen sum hi lo hi. A lungsim ngaihsutna le a hun a piakna bek hi lel hi.

1. Jew mite kipatah dan

(Sabbath nitak’ an neekhopna, Google)

 US a teng Israel mite a milip in 2% bek hi a, a sum hauhna uh pen 80% kici mawk hi, (JM Paupu). Banghangin Israel mite a omna munmun uhah, nuamsa in hau uh hiam?  Ko nupa Dayton (OH) ah ka om ngei uh hi. Jew mite Dayton khua ah a honin teng ngei uh hi. A mau ten sung a sumbawlna uh khangto mahmah hi. Tawlkhat khit ciangin a honpi mah in mundangah kituah uha, khuasung sumbawlna pen hong kiam mahmah pah mawk hi. A thusim uh pen: Sabbath ni zahtak uh hi. Sabbath ni in sum ngah beh ding hi taleh, nasem tuan lo uh hi. Friday nitak sabbath hun a lut lian leh innkuan kim ding hanciam uh hi. Anlim pen huan uh hi. Kikhop khempeuh a Pa un makaih hi. Lai Siangtho sim khawm uh hi. Thuhilhkikna 6:4-9, ci khawm uh hi. Israel naupang khat in a khua theih a kipan hih Lai Siangtho mun pen lotngah khin sitset uh hi. Nipi khat sung thupiang nopsakna, noplohna teng kikum uh hi. Haksatna teng kipulak uh hi, (Google). Hih dan a zat uh pen amau koikoi ah om ta leh zangden uh hi. Thu kikupna khit ciangin Pa pen in a ta pasalte thupha pia masa pen hi. Thupha a piak ciangin a lu tung uhah a khut nga tektek, a nu un zong khut ngakna ah huh hi. Ephraim le Manasseh (Joseph’ tate) bangin Thupha a ngahna dinguh  thupha pia hi. A kiangah a om theilote zong gal piak uh hi. Tua khit ciangin ta numeite zong, “Rebecah, Rachael, Leahte bangin, thupha ngah ta un,” ci uh hi. Nitak an ne khawm uh hi. Hih dan Israelte thusim Zomite tungah kong pulak sim hi. Kei bang a, a zekai i om phial zongin i tute tungah zat thei luat lai hi.

Thukhupna: Innkuan khat ah tate kisap penpen, nu le pate piaktheih in “2 S” bek ahi hi.

1. Significant (Innkuan khat ahihna uh)
2. Security (Inn sungah khamuanna )

Nu le pa’ itna a ngah dinguh tate’n lamen den uh hi. Tate i kin bawlna in kei hih innsungah hong kiciamteh lai hi, ci-in lungmuang uh hi. Innsungah a om lote kiphawk tangtang a i kizon, i kan tangtang pen tate adingin cidamna zatui hoih mahmah khat ahi hi. Kei loin, ka innsunguh mikim zo lo cih ngaihsutna neisak uh hi. Inn sungah nu le pa nuntak zia enin hih innsung muan huai hi, ci-in innsungah khamuanna ngahin mundang lungleng nawnlo uh hi. Nu le pa kitawngtawngte innsung ah nuamsa lo uh hi. Pate aw! I tate manpha mahmah hi. Pasian in suangmanpha zah a, a it tate a IT thei a KIN thei dingin hong siamciat ta hen! AMEN!