Nuntak khuasakna hamsa lua mahmah ahih manin nisim thu ka ngetnget a leh, 2001 Kum September kha in alamdang takin peek khat zong nei lopi mah Pasian ong geelsakna tawh Malaysia gamah sum thalawh dingin ka pai a, Malaysia ah tun nading cihdan gelkholhsa nei loin Puaisate ongpuakna munmun tung dinga a pai ka hi hi.

Malaysia ka tun taktak ciang Puaisa Laai Chinbo akici pa kiang tungin ka tungni mahun Putrajaya khuapi kilamna ong puaksuakpah hi. Azingteh nasep kuan pahin nisatang nuai ah nasep hamsa mahmah khat ka sem a, gim kisa lua “Aw hi bang maw, Malaysia pai” ci-in ka lungkia-in tha nemin ka om hi. Tua kawmkawm mahin kal-2 na ka sep khitciang thuneite’n ong manin thong sung ka tung hi.

Mawtaw kham thei lai ka hih manin gim mahmah sa-in thong sung ka tung hi. Thong sungah ngasa meh al lua mahmah bek kimeh ahih manin ka pumpi tung dimin cithak in ong bawkin meima tawh kidimin, Zatui zaha lah kicing lo ahih manin sih ding bek ngakin ka om hi. Tua hun lai pen thongkiate Passport neite bek Kawlgam kipuakin tualote thongsung ah a kumin ki-om hi.

Nikhat ka kiatna thonginn mei ong kang citciat ahih manin ko omna thonginn a om, gamdangmi khempeuh Thai gam ong kipuak ziau hi. Thai gam ka tun uh ciang, mite a meltheihte un dawnkhia pah ziahziahin kei ka hih leh, ong dawn ding lah om lo, Meima lah ka tungah dim ahih manin gamsung khat ah zuak ding danin ong kikoih hi. Puaisate’n zuak ding ong sawm uh hang, ka tungah meima dim ahih manin kua man ong deih lo sawnsawn hi.

Lungsim khempeuh bei ta ahih manin thungen kawmkawmin ka om laitak phone khat ong lutin ka pai lam a, ka Puaisapa Laai Chinboo in ong hopih citciatin mi kong dawnsak ding ong ci hi. Tuapa in ong dawn in Malaysia ka tungkik hi.

Meima tawh kidim ka hihman Laai Chinbo in innsung ah ong lumsak nuam loin ekbuk ah ong giaksakin tua mun ah ann ong pia uh hi. Puaisa pa ong pai in nang pen laibu lah neilo na hih manin zato kong lak thei kei ding, inn sungah ong si lecin kei adingin lauhuai ahih manin ninbung ah kong paaiding ong ciden hi.

Kaal-2 sung Puaisa pa kiang ka om khit ninbungah ong paih ni ding ma, nikhat in ka Innlak Pano le Ka pu in ong tankhia in ong dawn uha ka pu in a inn ah ong khoi-in zato ong lak a kha khat sungin ka ci ong dam sitset hi.

Ka ci ong dam pian ciang, ka pi sambawlna ah Sen Nupi mihau khat in ka mu nuam ci-in ong samsak a, ka mel ong muhphetin ka melhoih ong sa, ong pakta-in nasem dingin ong deih a, azingteh alawmpa tawh ong dawnpah uh hi. Tua ni a kipanin Khuasungah khuasathei-in US ka leng dong Malaysia ka tuncil lai a, ka nasep tawh akikhai mahmah innsung air condition sung ah kha sum ahoihzaw neek le dawn alimzaw tawh nuamtakin nasem thei beklo sum tampi tak ka thalawh thei hi.

Ka thuak laitak hamsa ka sak mahmah sam hang, Malaysia ka tun masakna munah kiman loin omsuak hileng, zulesa tawh kidiahin hamsatna tampi kituak ding banah sum thalawh veve nisa lakah gim pipi tawl pipi-in om ding cih pen Pasian in ong muhkolhsak ahih man kei ading ahoihzaw ong gelsakin ong kimansak na hihi. Topa minthang tawntung ta hen!

Jeremiah 29:11 na sung ah Pasian in ong gen mah bangin Pasian in i mailam ding ahoihzaw ong gelsak Pasian ahihna le kei ading asia ong geelsak ngei lo Pasian ahihna kasinkhak thute tungtawn in teci ong pang ka hi hi. 