Pawlpi tangthu kipatna ahi Sawltakte Tangthu pan pawlpi tangthu khempeuhah  pawlpi in Pasian piak gammail nasepna pen amau hih theihzahin sem den uh hi. Gammialna a sem pawlpite khangto in a nosuah bangin gammial nasepna a thusim lo pawlpite bei lam mahnawh den ahih lam pawlpi tangthu in teci pangin kimu thei hi. Tua ahih manin pawlpi khempeuh pen gammial nasep a sem ding pawlpite hi ngiat ding hihang. Gammial nasep pen a lunglutte bek tawh a kisai hi zenzen lo hi. Pawlpi khempeuh tawh kisai hi.

Gammial nasep le aana thuneihna kizelhsakna, gammial nasep le gamkekna hangin gammial nasep pen a maan lopi (ahi lo lam) in kingaihsun hi. Khat veivei, pawlpite in gammial nasep pen Khristian gam kilamhna (Christianization) ahihkeileh Biakna laihna (Proselytization)  te pen ngimna lianpen bangin ngaihsun kha uh hi. Amaan lo ngimnate ahi hi. A maan taktakin cileng, Pawlpi ii gammial nasep pen Khris ii lamhsa Pasian gam zaisakna ah kihelna ahi hi. Pasian gam zaisakna ah van bangin a kizang pawlpite ihih ding kisam hi. Pawlpi in ahih zawh bangin gammial na asep laitakin Pasian in zong tua mah bangin gammial na a sem ahi hi.

Pawlpi lam thukan K.L. Cober in Pawlpite in a nuai a bangin sepding mawhpuak nei uh hi, ci hi. Tuate in 1. Biakpiakna 2. Thuhilhna 3. Kilawmtatna 4. Gupna thu genna 5. Teci panna 6. Sila banga na sepnate ahi hi. A tatakin pawlpi khempeuh in, adiakdiakin  Mikang laimal M mal nih siksanin nasep nih om a, tuate in pawlpi sungah Pasian nasepna M- MInistry le pawlpi pua lam Leitung ah gammial nasepna cih M-Mission te ahi hi. Hih nasep nihte pen a nih in a kikimin thupi tuak hi.

A tunga i gen Pawlpite’ nasep ding nasep gukte lakah amasa thumte ahi Biakpiakna, Thuhilhna le Kilawmtatnate in pawlpi sungah sepding Pasian na sepnate (Ministry in the Church) ahi hi.  Pawlpi sungah sep ding Pasian na sepnate ii deihna bulpite ahih  leh, Mimal kim’ nuntakna ah Khris tawh kizomin kilawmtat theih nading Gup ngahsa mikim in pawlpi sungah kihelin a kisam –  kha, lungsim, le tual kizopnate ah huhna ngahin picingna lam ah a khantoh theih na’ng Gup nagahsa khat le khat kimaingap in Laisiangtho hong hilh bangin kician takin kilawmtat theih nading.

Mihing ihih manin nuntakna ah lam i khialh ciangin, lam maan lo i zuih khak ciangin itna tak tawh lam hong lak, thu hilhna i ngah theih na’ng. Kha pumpi, leitung pumpi tha zawm ciangin pawlpi pan a kisam- huhna, hanthawnna, semkhiat huhnate ngahthei nading. Pawlpi sunga om thu-ummi khempeuh in amau omna ciatah a thumaan tecite a suak theih nadingin kisinna phualpi suak ding, cihte ahi hi.

Siapi Rick Warren in “Kum zalom 20 hun pawlpite in a khangto pawlpi (Growing Church) ahih dinguh hanciam uh hi. Hih hanciamna pen thu hoih ahi hangin, lauhuaina om veve hi. Khangtohna simah mun tuantuam omin, mun khat bekah khantohna hangin tua khantohna in pawlpi pen khimin/khemin lungkimsak thei hi. Gent; pawlpi mi tam semsemna, sumpi khangna, biakinn hoih/ gol neihna, cih bang khangtohnate hangin pawlpite in lungkimin amunmun ah khantoh ding hanciam nawnlo uh hi. Kum zalom 21 adingin i deih ding thu in a khangto pawlpi hi zaw loin, a cidam pawlpi (Healthy Church) ding hi zaw hi. Ahang in, pawlpite a cidam ciang bekin amunmun ah khangto thei pan ding ahi hi,” ci-in gen hi.

Pawlpi sungah hoihtaka Pasian na a sem pawlpi pen pawlpi pua lam ahzong leitung mite lakah nasem ding ahi hi. A nihna sunga om nasep thumte  ahi lungdamna thu tangkona, teci panna le sila banga na sepnate in leitungah gammial nasepna tawh kisaite ahi hi.

Pawlpi khat ah Pasian na sepna le gammial na sepnate in a kikhen thei lo nasepte ahi hi. Leitung phattuam nading nungta-in leitung mite’ gup ngah nading sila bangin nasem dingin Jesuh in pawlpi a phut ahi hi. Tua ahih ciangin gammial nasep asem pawlpi hih nadingin pawlpi in thungetna, piakkhiatna, mimal a kihelna tawh minam tuamtuamte kiang pai ding ahi hi. Biakpiakna, thuhilhna le kilawmtatnate in gammial na sepna ahuh ding ahi hi. Alianpen nasep ahi gammial nasep pen  ahuh apanpih nasep ahi biakpiakna, thuhilhna le kilawmtatnate in amun a suankhiat (tuhkhiat)  loh ding thupi mahmah hi.

Gammial nasepna ah nungzui suahsakna pen ngimna in neih ding kisam hi. A kikhel thak thu-ummite nungzui suaksakin pawlpi thak kiphut thei hi. Pawlpi sunga om thu-ummite pen nungzui taktakte a suak nadingin thuhilhin, tua nungzuite pen gammial nasemte suaksak ding cih ahi hi. Gammial nasep in gamkek nasep hi lo hi. Pawlpi taina/kikhenna suaksak lo ding hihang. Khris pen mi khempeuh in thei-in gumpa le Topa-in a san nading bek tupna a, a nei nasep hisak ngiat ding hihang.

Lai-at: Sia Vung Cin Thang (Sia Thangno pen Zomi Agape Church, Bowling Green ah Mission pastor a sep laitak hi.)

Theihsakna: (Hih lai pen Rev. Dr. Simon Pau Khan En’ at Pawlpi le Gammial Nasep cih laibu, Adeihna Hong Kicing Ta Hen Le Adang Biakna Lam Ngaihsutna Thului Tuamtuamte laibu, le Abulpi Evangelical Sangte Ahuh Khutlet Laibu cihte a ki-etkak hi.)