Kommunis Romania gamah Pastor, siampi, le thu-ummite a kimat ciangin, numeite in amau munah teci pang uh hi. Numeite in pasalte bangin Pasian ading na a sep a muh uh ciangin Komuniste in lamdang sa mahmah uhin, bang cih ding, cih a thei kei uh hi. Kum nih khit ciangin pawl khat thong, pawl khat pen Siberia a sal banga nasepna campte ah puak uh hi. Tua laiah zong numeite in Jesuh adingin teci na pang uh hi.
Tua campte khat ah lokho mi numei 5 in Jesuh adingin teci na pang uh hi. Thongkia dangte tawh thu ngen khawm uhin, pawl khat Jesuh kiang tun’ uh hi. Zaan ciangin, amau thongkhaan ah Kommunis thong bu (ahi kei leh) thongcingte hong pai simin thu hong nget sak in, a ci uh hi. “Ka zi cina gim lua,” cih bangin thungetsak ding ngen uh hi. “Hehpihna tawh ama ading thu nong ngetsak thei uh dia? Ahang, kua mah na theisak peuhmah kei un”cih bangin gen thei uh hi.

Ni khat, thongkia mi 8 amau khaan ah a pai hi. Numeite zong lau pian uha, ahi hangin khat in, “Lau kei un. No tawh thungen khawm nuam a, hong pai hi ung,” ci hi. Tua mun ah Khristian numeite maiah khut dinsuk uh hi. Numeite pen gilkial, vuak thuak, le khuadamin ling keei uh hi mah leh, Pasian sungah thahatin khuah mahmah uh hi.

Amaute in Jesuh ading kha mangthang tampi man uh cih a zak ciangin, camp Director pa in numeite kiangah, “Ko kommuniste in Pasian thu na gen dinguh ka phal kei uh hi. Na gen teitei uh leh, dan kong pia ding hi,” cih gen hi.

Aizong i sanggam nute in khawl tuan lo uh; amau(Kommuniste) zong bangmah cih thei tuan lo uh. Pasian pen amau aa hi-in amau pen Ama aa ahi uh hi. Nuntakna a pia Jesuh thu gen cim thei lo, khawl thei lo uh hi.

Ni khat, camp Director pa in a puan lumte uh suahkhia dingin thupia-in thongkia a tul a sim, amau kiim ah ensak hi. A kheguak tawh tuikhal tungah dingsakin T-shirt khat bek silh uh hi.

Director pa in amau kiangin Pasian (ahi kei leh) Jesuh thu gen nawn kei nung, ci-in kamciam a piak mateng uh tua lai ah midangte etin ding dingin thupia hi.

Siberia a tuikhal tungah kheguak tawh a ding laitakin, i sanggam numei 5 te in Topa tungah phatna late sa uh hi. Director pa a heh mahmahhi. “Tu mahmahin na khawl kei uh leh, ui kong khahkia ding hi,” ci-in numei ngate kiang a hang phei hi.

Kheguak mahin tuikhal tungah khut dingin “Vangtunga om kote Pa aw….” ci-in thu nget kipan uh hi. Uite kikhahkhia-in midangte zong dai khipkhep uh hi. Uite pen i sanggam Khristian numeite tawh letmat tawm khat a gamlatna ah khawl uhin, tuikhal tungah tusuk uh hi.

“Hih pen Pasian’ nasep Na lamdang!”ci-in thongkiate awng ngeingai uh hi.
Mipi kitom ding lau ahih manin, Directorpa in numeite amau khaan sungah ciahsakin Jew numei siavuan khat sitsak hi. Siavuannu a kileh kik ciangin, Director pa kiangah “Bupa aw, numeite bang mah ci lo hi. Bang natna mah nei lo, bukkhuh beek zong vei lo uh hi,” ci hi.

Thong directorpa in dongin, “Nang pen siavuan khat. Science pilna nei numei khat. Hih bang khawng nong gen ngam? Siavuan khat na hihna tawh tawm beek nong gencian sam ve,” a ci hi.

Jew Siavuan nu in, “Bupa, Khristiante ii thunget ‘Vangtung om kote’ Pa aw,’ cih na zak pen gencianna kician pen hi pah hi. Amau, vantungah Pa khat nei-in, vangtungah Pa a nei peuhpeuh in na khempeuh sem thei hi,” a cih san hi.

Pasian in Ama mite koi ci bangin gualzawhpih cih Kommunis thongte sungah i mu khin hi. Amah Mah in hong dosak hi. Na lu phong inla, Jesuh en in. Na nuntakna le na lungtang sungah Amah na Topa dingin koih in.

(“Five Simple Witnesses” By Sabina Wurmbrand. The Voice of The Martyrs, March 2023, Vol.57, No. 3 pen endik pawlin a kilawm a kituak dingin Zolai tawh a let kik uh hi.) 