Sunday School nipi hong phuankhia pa pen Robert Raikes ahi hi.  1736 kum England gam Gloucester khua ah suak hi. Robert Raikes’ pa pen laikhen (press) nasem editor hi a, aman zong tua munah  nasem hi.

Robert Raikes pen a melhoih in atun sanga, a tha nuam mahmah le a migi mahmah khat ahi hi.                 Robert Raikes in thongkiate vei mahmah hi. Bang hangin thongkia hiam ? Theih loh man maw? Nasep Neih loh man le hunawng ngahluat man hiam? ci-in puahphat ding hong hanciam hi. 1780 kum teh naupang pattah hong kipan khia a, a hau a zawng a nin mahmah naupangte hong kaikhawm hi.

Tua naupangte pen Gloucester khua a phim (pin) bawlna ah nasemte ahi uh hi. Tua naupangte in Nipi ni bekin hun ngah uh ahih manin a ut banga hun a zang uh ahi hi. Lampi ah kimawl uha, zulesa ne in la hoihlote sa in siat gamtat thei mahmah uh hi.

Amasa in Robert in pasal noteng kaikhawm masa a, azawng numeino khat makaihsak hi. Tua numei nonu nikhat in pound khatta tawh cial den hi. Hih bangin hong zom to suak uha,  thukizakna  tuamtuam (New paper) ah kipulak khiatsak hi.

Wesley brother—Whitefield te’n thapia in huh mahmah hi. Tua bangin hong lawhcin semsem uh ciangin 1783 November 3 ni-in Sunday School hong phuankhia a, Gentlemen’s Magazine sungah tangko khia uh hi. Tua hun lai takin mihau mahmah Willam Fox huhna tawh Mikang gambup ah a kizelh nangin vaihawm uh hi.

1784 kum in Sunday School naupang pasalno 77 le numeino 88 phain uniform  neisakin lukhu khusak ciat hi. Ki-ukzia ding, makaihzia ding le ngiamna tuamtuamte board phuankhia, vaihawm khawm uh hi. Pumpi siantho nading le biakinn sungah omzia dingte lim hilh mahmah uh hi. 1785 kum in zatding lai bu khat atkhia a, “Sim dingin Baih”( Read Made Easy) cih ahi hi.

Tua bangin Sunday School hong zat zawh kumli khit ciangin England gamah Sunday School naupang 250000 pha hi. 1811 kum in Robert in Dula natna tawh hong si hi. Ama sihvui hun bawlna ah Sunday School naupang khempeuh in khakna lasa in lungleng mahmah uh hi, ci hi. Ama deihsakna, veina le hanciam na hangin tuni dongin leitung buppi ah pawlpi namkim in Sunday School I nei kimciat hi.

(Khristian Nithupite, July 2012, laibu pan kila kik hi. )