US gam ah teeng ihih manin i gam kumpi kikoici teel hiam cih theih ding kisam ahih manin tutung Theihhuai Tuamtuam sungah kong suaksak uh hi. (Endikpawl)

Thupatna

US pen Dimukrisi gam lak pan a lianpen nihna hi a, hih ki-ukna sawt a zang pen (kum 219) zong ahi hi. Sumbawlna lam ah a hau pen  le galvai ah zong a hat pen gam hi. Tua manin gam khempeuh in na khempeuh phial ah a etcik, a etteh mahmah gam hi.  US inzong gam khempeuh phial a va saisuk den gam ahih manin a ensan gam zong leitung bup lang bang na hi pah hi. Pawl khat in Leitung bup Palik kici liang hi. Hih thute hangin US kumpi kiteel pen US gammite ading bek hi loin, leitung bup adingin vai thupi mahmah khat hong suak hi.

Presidential Primary Kiteelna

Hih kiteelna pen  kiteelpi taktak a kibawl ma-in, gamke partite le gamke kumpite  in a bawl uh, gamke parti sung kiteelna ahi hi. Gamthu lam Naingangyi partite in amau parti pan kua in kumpi kidemna ah lut ding hiam cih a khensatna uh ahi hi. Gent: Republican partite in kumpi ut mi tampi lakah khat teel khia-in amau parti tangin kumpi kiteelna ah lutsak ding uh hi. Tua bangin gamke simah kibawl dinga gamke 26 ah a zote in kumpi kidemna ah lut thei ding uh hi. Tua mah bangin parti dang ahi Demorcratic le Libertarian parti-te inzong hih ding uh hi. Kentucky gamke ah Nipi zawh ni nih ni, May 21, 2024 ni pen presidential primary kibawl ni ding ahi hi.  Gamkete in amau bawl nop hunin bawl uh ahih manin a ni le a hun kibang lo hi. Tua ciang, closed primary le open cih om hi. Ei gamke pen closed primary hi. Closed primary ah parti lutte bek in vote khia thei bek hi. Open ah parti kipawlna neilote in zong vote khia thei hi. Kentucky primary ah vote na khiat nop leh, vote registration ah Democratic ahikeileh Rebuplican na cih kul hi. Non-affiliated/ non-partisan na cih leh, primary ah vote khia thei lo ding hiteh. Kumpi kiteelpi November 5, 2024 bek ah mee khia thei bek ding na hi hi.

Issue tuamtuamte

Tutung a hawt (hot) pen issue (Buaipih Thu) ding in nung deuhin a sangpen thukhen zum in a phiat kik  Nauphiatna vai (Abortion) hi ding hi. Tua ciang, tukum sung sang ah thau kapna (tu ni 5/13/23) 19 omin, mi 11 si-in 19 liam ahih manin, Thua tawh Ngongtatna (Gun Violence) zong a nasia mahmah thu hong suak ding hi. A thumna ah Gender Kilaih vai (Transgender issue) hi ding hi. US ah laitan sangte le khuapi sungteeng mipite in hih vai ah a panpih mahmah uh hangin, Mikang kihihsak (White Supremacist) te le Evangelical Khristiante in nak langpan mahmah uh hi. Nung deuh thupiang khat ah, Bud Lights beer kompani in transgender  Dylan Mulvaney cialin a beer uh kyawngyia sakna hangin, beer dawnte in langpangin tua beer lei nawnlo uh ahih manin, kal khat sungin tua kompani million tampi sumh hi. Tua manin hih gender issue zong  a nasia mahmah issue hi ding hi. Tua ban ah gamdang mite’ Gamsung lutna tawh kisai Immigration issue zong a ngei mah bangin a hawt mahmah thu hi lai veve hi. Gamdang tawh kizopna Polisi (Foreign Policy) le Thukhun Palsakna (Crime) tawh kisai sepzia dingte ah parti khat le khat muhna kilamdang lua ahih manin hih thute pen 2024 kiteelpi ading a hawt issue-te hong suak ding hi.

Kiteelpina

Gamke primary kiteelnate ah gamke 50 lak pan a tamzaw a zo parti tuak pan palai (candidate) te kiteelpi ah kidem ding uh hi. A ni pen November kha, amasa pen Nipi Khuavak Ni (Monday) zawh NiNih Ni (Tuesday) ta hi ding hi. 2024 kumin November ni 5 ni tawh kituak hi. US kumpi kiteelna pen popular vote kizang loin, electoral college system kizang hi. Popular vote tawh kiteelna ah mipi vote khiat zahzah a tam ngah pen in a zo ahi hi. Hih US electoral college system ah kumpi teel ding mi/ palai elector-te a kiteel ahi hi.

Elecotor-te

US gam bup ah electoral vote 538 omin, elector zong 538 hi pah hi. Congress (Senate le House kigawm)  ah palai om zah tawh kikim hi. Kum 10 sim a, kila gambup mi phazah Census tawh kizui-in gamke khat in a ngah zah ding electoral vote kikhensat hi. Mi tam gamkete’n tam ngah uh hi. California state in 55 ngah in Vermont le a dang mi tawm gamke pawl khat in 3 ta bek ngah hi. Hih kumpi teel ding elector-te pen amau parti ciat in teel hi. Tua manin kumpi kiteelna ah a lut candidate kim in amau ading elector-te (Slate kici) gamke kim ah nei ciat uh hi. Kiteelni ciaingin mee laidal ballot tungah candidate-te min a tuan hangin, vote i piak taktak pen tua candidate pa/nu vote a pia ding elector slate ding a teel zaw ihi hi. Gamke sim ah Democratic candidate ii elector slate le Republican slate om hamtang hi. Tua ciang, third parti a om leh, tuate slate om ding hi. Parti nei lo candidate a om leh zong, tua nu tua pa ii slate zong om ding hi.

Gentehna-in,Kentucky ah Trump in mipi vote a tamzaw a ngah leh, Republican parti in a teelsa elector mi 8 slate in teelna angah ahi hi.  Hih elector 8 te in Trump adingin December kha sungin Kentucky khuapi ah vote va khia ding uh hi. Biden lam ah vote khia thei lo uh hi. Amin a, kiteel bek hi-in, kua lam ah vote khia ding cih pen gamke upadi in a kipsaksa ahi hi. Gamke sungah popular vote a zo candidate bek ading vote pia thei cih a kikipsak sa ahi hi. Tua mah bangin kiteelna ah Biden in vote tam angah zawk leh, Democratic Parti in a teelsa, Biden bek vote a pia ding elector-te in a tunga mah bangin Biden ading vote khia ding uh hi. Alang lam ah vote khiat khuan om lo hi. Nebraska le Maine lo buang ah “the winner take all” kizang hi. Mipi vote a tamzaw angah peuhpeuh in tua gamke ii electoral vote neih khempeuh a ngah ahi hi.

Tua a kiteel elector- te in amau gamke tekah December kha sung kimu-in thukhun omsa bangin amau piak dinga kiciamsa President le Vice-president adingin vote pia ding uh hi. Tua amau vote piakna pen Gamke ukmangpipa (Governor) ahi kei leh, Gamke Lai-atpi (General Secretary) in ciamtehin Washington DC Capitol ah tua mee sayin certificates khak uh hi.

Jan 6 ni ah Congress

Congress pen Jan 6 ni in kimu-in tua electoral vote-te in simin, kipsakna nei uh hi. Hih mee simna ah Senate Lutangpi ahi Vice President in hun-uk semin makaih hi.  2020 kiteel zawh, 2021 Jan 6 ni electoral vote simna ah Trump a deih pawlin vote a kisim theih loh nadingin va nawngkaisak uh hi. Tua laiah hun-uk sem Mike Pence in Trump a pia lo electoral vote-te a sim lohna ding (Gent; thubuai, a thu siang nai lohna gamke ahi Atlanta le Penslyvinia gamkete’ electoral vote-te pen sim loh ding (pee mee) in) ngen uh hi. Tua gamkete kisim kei leh, Trump in zo ding hi, cih ngimna tawh a sep uh ahi hi.

Kumpi Thak Kahna

Kumpi kiteelna ah a sem lui pa in lelin, a thak a kah leh, Jan 20 ni in aana kipiakna om ding hi. Jan 20 ni pen Nipi Ni tawh a kituak khak zenzen leh, Jan 21 ni hi ding hi. Hih lai ah a thupi pen ah US thukhen mangpipa in Laisiangtho tawh kiciamna neisak ding hi. Kumpi thak pa in mai lam ah a sep sawm teng le polisi teng gen kholhna Speech nei ding hi.

Thukhupna

Ki-ukna a hoih gam  ah nutakna nopin a kisuak ta mah bangin, sep ding le tavuan in zong hong zui pah hi. A gam tawh kizui in a tuamtuam om ding hi mah leh, a masa pen le a thupi pen in thukhun zui ding zahtak ding (Rule of Law) hi pipen hi. Tua zom ah vote khia ding le siah tung siah phei pia (Taxes) ding ahi hi. Rom 13:1 ah hong uk kumpite’ thu na mang un, a cih mah bangin, vote tawh i teel i kumpite’ thu mang ding le zahtak ding pen Pasian deihna ahi hi.