Dr. Zam S. Khai

Thupatna:  C. T. Studd in “Khatvei nuntakna, a sawtlo in hong bei dinga, Khazih ading sepkhak teng bek tawntung dong kimang suak ding hi” {“Only one life, ‘twill soon be past, Only what’s done for Christ will last”}^[1] ci hi. I pianthak khit zawh i sepna i bawlnate khempeuh kiciamteh in thaman kingah hamtang ding hi, cihna hi. Mark Hitchcock in zong hih bangin gen hi: “Tuni na nuntakna in na tawntung nuntakna khensat ding hi”^[2] ci hi. Ahizongin ‘gamtat hoihna in vantung hong tun ding hi’ cihnopna hipah lo hi. I pianthak khit i nuntakzia in vantung ah i omzia ding khensat ding hi. Pasian adingin i neihsa, i hun, i theihna, i siamna tuamtuamte i zatkhiatnate tungtawnin thaman kingah ding hi. Pasian min puasakin i sepna khempeuh thaman kingah gai ding hipah lo hi.  I lungsim tawng omziate le i sepkhiatnate Pasian’ zia-le-tong tawh a kituak leh,  thaman kingah ding hi bek hi. Tua hangin Pasian’ deihna tawh kituakin i nuntak ding le Pasian’ deihna tawh kituakin i sepkhiat ding thupi mahmah hi.

Hehpihna hang bekin Upna tawh tatkhiatna kingah thei hi. Gamtat hoihzawhna hangin tatkhiatna kingah hi lo hi (Titus 3:5-6). I pianthakna dingin  hehpihna hangin a kingah thupha in khawnkhong gupkhiatna hi. I pianthak khit ciangin gamtat hoih lahna hangin a kingah ding thupha in thaman ahi hi. H. A. Ironside^[3] in leitung ah biakna nampi nih bek om hi. Khat in ‘sem in’ ci in a dang khatin ‘sepsa’ ci hi. Hi mah hi. Khristian upna in sepsa upna ahi hi. Zeisu in Kalvalry ah hong sepsaksa hi-in upna tawh i sanziau manin ‘sepsa’ upna kici thei hi.                     Lai Siangtho sungah thaman mun tampi ah kigelh hi. Thuciam Lui hunin Abraham tungah Pasian in “Lau kei in, Abram, Keimah in na lum ka hi a, na thaman in lian mahmah ding hi” (Pian 15:1) ci-in na gen hi. Pasian zahtakna hangin thaman kingah ding hi cih Late 19:9-11 ah kigelh hi. Thudik (thutang) mi in thaman ngah dinga (Late 58:11), thudikna khaici vawhte in thaman ngah takpi ding hi (Pau 11:18). Mihing’ gamtatna tungtawn in thaman kipia ding hi (Late 62:12). Isaih 40:10 le 62:11 ah Topa in thaman hong pua in hong pai hi cih kigelh hi.

Thuciam Thak sungah zong thaman ngahna ding mun tampi ah gen hi. Zeisu in a kitangsam mite huhna piakna hangin thaman kipia ding hi (Matt 6:3-4) ci hi. Mipi mai-ah kineih thungetna sangin simtham thungetna kisang zawin “a kilanglote a mu na Pa un a kilangtang in thaman hong pia ding hi” (Matt 6:6) cih Zeisu in gen hi. A langtang antanna sangin simtham antanna thupi zawin “a kilanglote a mu na Pa un a kilangtang in thaman hong pia ding hi” (Matt 6:18) ci hi. Zeisu in “Kamsang khat pen kamsang ahih mana a sang mi in tua kamsangpa ngah bangbang thaman a ngah ding hi. Midik khat pen midik ahih mana a sang mi in tua midikpa ngah bangbang thaman a ngah ding hi” (Matt 10:41) ci hi. Pasian nasem khat Pasian’ nasem ahih manin zahtaknathu, pibawlna le thumanna hangin amau thaman kingah khawm ding hi. Pasian’ kammal bulphuh in mantak in a genkhia le a nungtak pih Pasian nasepte a cihnopna hi. Hong thukkik zo lo ding mizawng daipam le meigong tagahte tungah thuphabawl in na huhnate hangin “midikte’ thawhkik ni ciangin nang hong kithukkik ding hi” (Luke 14:14).  Pasian nasepna ah Pasian min adingin neihsa lamsa, ulenau le leitung nopna a nusia ngamte in thaman a zah tampi ngah ding hi (Matt 19:29) ci hi. C.S. Lovett in “Salvation gets us to heaven, but works determine what we do after we get there”^[4] (‘Tatkhiatna i ngah manin vantung kitung hi-a, i gamtatnate in vantung i tun ciang bang sem ding cih hong khensat ding hi’) ci hi. Pasian deihna tawh kituak nasep hoih nasep pha i septe in vantung ah i ngah ding hamphatnate le panmunte khensat ding ahi hi.  Zeisu min tawh zindo in tui haikhat na suahna hangin thaman om ding hi (Mark 9:41) ci hi. Luke 6:35 ah na galte tungah itna lakin na hoih na sepna le ngah kik ding lamen lo-in leitawisakna hangin thaman tampi na ngah ding uhi, ci hi. Hih i gensa thaman tuamtuamte in a huampi in a kigen i ngah ding thamante ahi hi. Ahizongin Lai Siangtho sungah kigen a tuam vilvel thaman nam ngate kikum suak dih ni.

Vantung Khamlukhu Nam Ngate

1. A kisia theilo lukhu (the incorruptible crown): Pumpi kikhalzawhna hangin a kingah ding khamlukhu in ‘a kisiatheilo lukhu’ ahi hi. Silesa zehetnate nang zo in Pasian deihna tawh kituak in nisim in a nungta zote ngah ding lukhu hi. Thuum khatin silesa lam ah zualzang lo nuntakna in kikhalna lianpi khat ahi hi. Paul mahmah in zong pumpi ki-ukzawhna thu nakpi in gen hi. A kisiatheilo lukhu ngah theihna dingin santham lo ka suahkhak lohna dingin ka pumpi kikhalna nakpi in ka hanciam hi, ci hi (I Cor 9:24-27).
2. Dikna lukhu (the crown of righteousness): Topa Zeisu kilat ding a lunggulh khempeuh adingin ‘dikna lukhu’ kipia ding hi (II Tim 4:8). Topa leitung ah hong kumkik ding lawp takin ngakin thudik nuntakna tawh a nungtate in ‘dikna lukhu’ ngah ding hi. Zeisu hong paikik ding lawp takin a ngakte in a siangtho a namtui nuntakna tawh Topa ngakkawmin nungta ding cih lawpna nei thei uhi. Tua bangin a nungtate ngah ding lukhu ahi hi. Zeisu paikik ding thudon lo in siangtho nuntak ding a hanciam lote in ‘dikna lukhu’ ngah lo ding uhi. Hih lukhu in a ngakpa/ngaknu lukhu (watcher’s crown) zong kici hi. Siangtho nuntakna in vantung lunggulhna hangin vantung malep nuntakna khat ahih manin vantung gimnam nuntakna kici thei hi.^[5]
3. Nuntakna lukhu (the crown of life): Zeisu upna tawh Tanpa le Topa in a sang khempeuh in nuntak tawntungna ngah ding uhi. Ahi zongin ‘nuntakna lukhu’ ahih leh, Pasian min adingin bawlsiatna a thuakte ngah ding lukhu hi. Bawlsiatna tuamtuam thuak in kithahna ciang dong a thuakte in a ngah ding lukhu ahi hi. Paul in II Timothy 3:12 ah hih bangin gelh hi: “Khazih sungah Pasian deihna banga a nungta nuam mi khempeuh in bawlsiatna a thuak ding uh hi.” Khristian nuntakna ah ze-et bawlsiatna tuamtuam thuaknapi in a upna nusia lo-in a Topa a taisan lote in a ngah ding lukhu ahi hi. Haksat zehet kawmkal ah citakin Pasian zahtakna tawh a nungta vevete in ngah theih ding ‘nuntakna lukhu’ ahi hi (James 1:12; Mang 2:10). Rom 8:18 ah “Tu laitak a i thuak gimnate ka ngaihsut ciangin eite tungah a hong kilakkhia ding minthanna tawh tehkaktham ka sa kei hi” ci-in Paul in na gen hi.
4. Lungdamna lukhu (the crown of rejoicing): Gupkhiatna gensiamna letsong mikim in kingah lo ahi hangin mikim in i upna teci pangin kihawmsawn thei hi. I upna thu pulakin mite tungah kigensawn thei hi. Vantung in lungdamna tawh kidim mun hi ding ahih manin vantung tunna ding thu teci pangte in hih ‘lungdamna lukhu’ ngah pah ding hi. Khamangthang veina hangin kingah lukhu ahi hi. Paul in “kote lamet ding, nuam nading, lungdamna lukhu in bang ahi hiam? I Topa Zeisu Khazih hong pai ciangin ama mai-a ka angtanpih ding uh note hilo na hi uh hiam?” Banghang hiam cihleh note in kote angtanna le lungdamna na hi uh hi” (I Thes 2:19-20; Phil 4:1) ci hi.
5. Vangliatna lukhu (the crown of glory): Tucing pastor-te in citakna tawh Pasianna a sepna hangin a ngah ding uh lukhu in ‘vangliatna lukhu’ ahi hi. Haksat-bawlsiat gensiat zahpihna tampite a thuak hangin citak-tak lungduai-tak le itna-tak tawh Pasianna a sepna hangun a tuam vilvel le a thupi mahmah in a ngah ding uh pastor lukhu ahi hi (I Pe 5:1-4). Lukhu masa li-te ahih leh, thuum mite in a ngah theih ding lukhute ahi hi. Thuum khat in lukhu khat sangin a tamzaw ngah thei ding hi. Ahi zongin hih ‘vangliatna lukhu’ in Pastorte bekin a ngah ding a tuam dang mahmah lukhu ahi hi. Pawlpi makaite pawlkhat, upate pawlkhat le pawlpi mite pawlkhat in i pastorte i gensiat i bawlsiat i simmawh nate hangin a mau’ vangliatna kham lukhu dingte a bawlkholh saksak hi gige hang cih kiphawk gige ciat ding thupi mahmah hi. I pastorte khat vei i gensiat sim in a khamlukhu ding a bawlbawl i hih lam kitel leng, i nuntakna kilamdang zo ding hi. I pastorte khat vei i langpan simin a mau khamlukhu a bawlbawl kihi gige cih phawk leng, i nuntakna a kilamdan loh phamawh hi.

Thukhupna: Pawlpi sungah a sialam ah kizang kha le a hoih lam ah kizang kha mi nam nih om hi. Pawlpi sungah makai bang sem keei in panmun tuamtuam semin, sumlepai tampi bei in, hunlenite tampi bei in nasem tampi kiom ding hi. I theih ding a thupi in i lungsim tawng hong en gige Pasian ahi hi. Pawlpi makai pipi sem le Khristian kum tampi hi khinin thaman hawmna mun a tung lo i om khak ding dahhuai mahmah ding hi. Thaman hawmna ah thaman ngah lo zong ki-om ding hi. Zeisu in vangtung gam ah na liat nop leh, mite’ sila na suak phot in ci hi. Matthew 20:26 “Note lakah a lian a suaknuam mite in note’ sila hita hen.” Matthew 18:4  “Hih naupangno banga, a kiniamkhiatte in vantung kumpigam sungah a lianpen ahi ding uhi” ci hi. Khamlukhu ngahna dingin naupang bangin kiniamkhiat kul hi.

A hun omlai in kipuah pha ni. Zeisu a sang nailote in a hun om lai in sang pah ni. Vantung ah a upmawh huai mi tampi kimu kha lo thei ding hi. Thaman hawmna ah a upmawh huai mi tampi in ngah lo kha thei ding hi. A thuman taktak pen Pasian bek in thei ding a, ni tawpni thaman hawm-ni ciangin kilang khin ding hi. Rapture laktoh khit ciangin vantung Bema Khazih Thukhenna mun ah thaman hawmna om ding hi. Tua khit ciangin thuumte in Khazih tawh Kumtul Manna zang dingin leitung ah kikumsuk ding  hi.  Kumtul Manna sungah misiangthote in  tua thamante zeekin thuneihna le ukna dinmun tuamtuamte  la-in Khazih ukna nuai ah mapang ding uhi. Thaman le panmunte in kumtul manna bek ah kizang ding hi loin, tawntung nuntakna vangtung dongah kizang ding  hamphatnate ahi hi.

Hih leitung ah, thuummi khat i hih manin i thuaknate in i ngah ding khamlukhute tawh tehkak ciangin gentham hetlo ding hi. Hih leitung ah Pasian nasem khat i hih manin i thuak haksatnate in i ngah ding khamlukhute tawh tehkak ciangin gentham hetlo ding hi. Matthew 13:43 “Tua ciangin midkite in a Pa uh kumpigam sungah ni bangin a tang ding uh hi.” J. Dwight Pentecost genna ah: “…Thuummi khat tungah a kipia thaman in tawntung ah Khazih vangliatna kilangsak theihna nei ding hi. Thaman lian semsem leh, Pasian vangliatna kilangsakna lian semsem ding hi…”^[6]  Hitchcock in “Vangtung ah mi khempeuh hai dimkhin gai ding hi; ahi zongin hai pawlkhat in a dangte sangin gol zaw ding hi” ci hi. Mikhempeuh ni bangin tangkhin ding hi, ahi zongin a tang zaw deuh bel ki-om kha thei ding hi.

[1]https://www.tms.edu/blog/only-one-life/.

[2]Mark Hitchcock, Heavenly Rewards: Living with Eternity in Sight (Harvest House Publishers:

Eugene, OR, 2019), 11.

[3]Hitchcock, Heavenly Rewards, 29.

[4]Cited by Mark Hitchcock, Heavenly Rewards, 27.

[5]Woodrow Kroll, Facing Your Final Job Review: The Judgment Seat of Christ, Salvation, and Eternal Rewards (Wheaton, IL: Crossway Books, 2008), 189.

[6]J. Dwight Pentecost, Things to Come (Grand Rapids, MI: Zondervan Publishing House, 1958), 226.