I pu i pate’ pilna le theihna khempeuh pen lakam le paunakte tawh kiciamteh hi. Lai nei lo ihih manin kam tawh lotngah (Oral Tradition) ciamteh suksukin a khang a khangin kihilh sawnsawn hihang. Hihte sungah pilna lak theih ding tampi om bektham loin lai lam tawh kisai lakam, kam malthuk, tang(lai) kamte (Pau upa) kihel ahih manin i gou i gamhpi ahi hi. Thei ding, pilna la ding, le kepcing ding ahi hi.

23.Akpi khuan hangin khuavak lo.

Akpi’ khuan hangin khua a vak loh bangin, numei thu-in thulian vailian kihawm zo ngei lo.

24.Akpi’ lei thai zong nuam tuam.

Lo khawhna le huan sungte ah, akpi’ lei phiatna hangin noptuamna them khat a om bangmahin, cihmawh hun a, them khat kihuhciauna zong nuamtuam hi, ci-a genna.

25. Aklui khuangtah ci-a, akpi khuang lei

Pasalte’ thupi gen laitak-a, zite in kup lei pan, akpi khuang bangin a kimuh khak hun om thei.

26 Ak tangtaii bang.

Phek sunga taang kipho, ak in a kham a nek khit ciangin a phiat gawp bangin, mihing zong khatvei peuh ankhing khamin gilvah leh a gilkial thei nawnlo ding bangin gamta kha thei.

27.Aktui’ mong le zang khekhap kikan thei lo.

 Pasal paktatte le aktui mong zon, gentehna. Aktui mong zon theih loh bangin pasal paktatte’ gamtatna zong kikan thei lo.

28. Akpi nawi hawm.

Nawi nei lo akpi in, lei phiatin a nawi tangin a note an a neksak bangin, neih le lam kicing lo napi, u le nau, le khua le tui sunga midangte adingin a deihsak mi hoihte genna.

29.Ak banga muh tawm ne.

Neih kholhsa om loin, nisim a zontawm tawh leiba lo-a nuntakna.

30.Ak tangtang’ tawm bang.

Ak in tangtang tang khat sim-in a top bangin, khat le khat kampau a malmal-a kitawm a, a hoih topna a om mah bangin sia lam a topna zong om thei.

31. Akgeh si ding bang.

Aklui cil get khial leng zawngkhal in, sih lawh thei a, mihing zawngkhalte zong akgeh si ding bang, ci-in kigenteh.

32. Ak-gia kawi bang

Ak-gia kawi etlawm mawh lo napi, sing le thu ak-gia kawite pen kizang thei lo.

33. Ak in a cil ne bek

Aklui a kigeh ciangin a cil kinesak hi. Mi khat in ama’ tanau naihuai sungah angsung thei-in a huaiham ciangin, kilawm lo mahmah cih, gen nopna.

34. Ak-gia sawnkai tot

Zomite tungnun kidemna ngeina sungah gal man sakapte in, a thah a mat simna in, gal a mat zah sawnkai bawl, ngaltang a mat zah sawn-tan bawl, sakhi a mat zah ak-gia bawlin a lu tungah suang.

35.Akno si zong paulap bang

Sihna beina, supna zatna khat peuh a om ciangin, a hang zong tawm leng akno si nangawn paulap bang, na ci hi.

36.Ak ihmu bang

Ak ihmu pen ihmu cip loin, mengme bek ahih man-in khuaphawk gige ahih bangin, mihing zong ak ihmu bang om thei, cihna.

37.Ak gilgap bang

Ak pen a gil ah giak lo, mun danga giakte gilgap kici hi. Innkuan vaihawmna lo pi tawh hawhna banna peuh-a giak, innkuan thudon lote ak gilgap tawh kibang cihna,

38.Aktui bang a dawm

Aktui a bu ak ziinling leh dahin keuh nawnlo thei, mihing zong akdah bangin piang thei ahih man-in, kidawm ding cihna.

39. Akneel phunphun bang

Akneel bang a phunphun. Kimanna om khol lo pi-a, kam paupaute, akneel phun bang, kici.

40. Akpi ta pha bang

Akpi in suan le khak hau-in, koi tengah om cih a theih loh bangin, mihing suan le khak haute tawh kigenteh.

41.Ak tuam man bang

– Pute’ inn pan aktuam kimanin, tua ak a tui ciangin pute kikholhkik a, pute in a tute thupha pia in, thupha lakna lim lahkhiatna.

42.Akpi’ lungsim zong baan lo

Akpi in lei phiat in, a muh ante amah in ne loin, a tate nesak masa a, a note a hihsak om leh a thaneih zah tawh honin, zanin a khalum ah uap hi.Mihingte in a tate a vakna a khoina lam ah akpi lungsim a ban lo ki-om thei, cihna.

43.Ak op ek zah

Ak op in a tui a lum nadingin a ek nangawn tha khia loin a thak vanglak ciangin, ak ek ding a kilawm sangin a tamzaw a thakkhiat bangin, mihing zong thu le vai khat peuhpeuh ah a kilawm zah sang a tamzaw thute, uang genna in kizang.

44.Ak op tuak khia, sangak in man

Ak op tuak khia, sangak tuak, Ak op tuak khia a tuahsiat bangin, mihing zong khat vei peuh a pua pial ciangin tuahsia thei, cih na hi.

45. (Hih 45 na pen kician lo ahih manin a kihal hi. A maan ka theih uh ciangin hong suaksak kik ding hi ung. )

46.Ak, taang tu bang.

Ak taang tawm bangin cihna hi a, Ak in taang tuk bangin nawh tuk mahmah. Nawhsep cihna.

47.A khau en lo, aitang en.

Thang khau en masa lo a, antah bek a en vasate a awk mah bangin, a thu en masa lo a, hamphatna ding bek a ente awk thei, cihna. 