Zo Paunak le Thugilte
I pu i pate’ pilna le theihna khempeuh pen lakam le paunakte tawh kiciamteh hi. Lai nei lo ihih manin kam tawh lotngah (Oral Tradition) ciamteh suksukin a khang a khangin kihilh sawnsawn hihang. Hihte sungah pilna lak theih ding tampi om bektham loin lai lam tawh kisai lakam, kam malthuk, tang(lai) kamte (Pau upa) kihel ahih manin i gou i gamhpi ahi hi. Thei ding, pilna la ding, le kepcing ding ahi hi.
- A lam om a, a ne om
Mi khat’ lamsa midangte in nek pih, pasal khat in a khang sung a, a lamsa a theih kholh lohin a mo le a tate in zek thei.
- An nek hak hiing thei
Thusia bilh, sia zaw sem thei.
- An no in sikgin ngai
An no in a bul to-in a phungvuk leng lungkim-a khang.
- An phul tan lah mei tuh mit. (Sumit)
Mei kuang lua in an phul a, mei a tuhmit bạngin, mihingte zong ama gamtatna khengvalin aman siasak thei, ci-in kihilhhilh napi a mang lote, sihna dong piang thei cihna.
- An no in khe dang hua
An no le tangpo tung lakah kipheng vak lo.
- An din sagih le tuga om
An tampi ne un; huan min sa dintan sagih om a, a bei lehzong i khawh lai nading tuga om hi, a cih ciangin an kham pikpek a nek ding, deihna uang genna.
- An gau tang
Leengla khat in an nek khit phetin inntekte nusia pah lo.
- An ngaklah pha, thu ngaklah pha lo
An nek baih manin khialhna om lo napi, thu ngaklahna hangin khialhna om thei.
- Anpaa la-a, pakai
Nek ding an bat laklak, a loh lah ciangin tokai kul.
57.Ankhing suan so, sa diak; thu sia satsuah, sia diak
58.An ne khawm, tuidawn khawm
Zomite in kuang khat sungah an ne khawm, zubeel khat peng phutin dawnkhopna pen lungsim kigawmna, pumkhatna kipatna ngeina-in nei, cihna. Khuado pawi, sialsawm pawi le innkuan vai tuamtuamte ah nuntak lai-a, ankuang um khop, tui dawnkhop pen thupi a sak penna kammal hi.
- An min ngaklah bang
Gilkial man-a an ngaklahna le mailam nuntak nading nasep nop thute genkakna.
- A phei’ tung a sa sem
Ama phei tungah sasem leh amah a ki-at khak mah bangin, eimah le eimah ulenau sunga huaihamna le thuman lohnate genna.
- A si masa puantuam tang
Tanglai in Zo ngeina sungah puan kinei lo a, ahi zong misi puan ding vaihawmsak hamtang ahih manin a nungta laite sangin misite a hamphat zawkna a gen ciangin, a zat kammal hi.
- A si mong sisi, mincim mong cimcim
A kamsiate kamsiatna kizomzom thei.
- A tee khempeuh kham hi lo.
A hoih khempeuh manpha kim lo.
- A tai, gualzo om ngei lo.
Khualetui, le hausa tawh kilem lo-a taite a tunna munah zong gualzo lo.
- A tum-te’n kum khua tum, a kikemte kumthum kikem zo lo.
Tanglai phu kilak hun lai-in phula nuampa in kum khua dong sawm tinten a, a lak nop mite kumthum dong nangawn kikem zo lo hi, cihna. “A sawmte’n kum khua sawm, a kikemte kum thum kikem zolo’ zong kici hi”
